Moskvada homilador ayol roʻmol oʻragani uchun kaltaklandi

Rossiya poytaxti Moskvada 21 yoshli homilador ayol roʻmol oʻragani uchun 63 yoshli erkak tomonidan temir chiviq bilan kaltaklandi. Ayol zudlik bilan kasalxonaga yotqizilgan, homilasining hayoti xavf ostida qolmoqda. Erkak ushlangan.

Rossiya poytaxtida homilador ayol roʻmol tufayli haqoratlanib, soʻngra kaltaklandi. Bu haqda “Baza” Telegram kanali xabar qildi.

21 yoshli moskvalik Milana onasi bilan “Domodedova” metro bekatiga kiraverishda turganida, 63 yoshli erkak ularga yaqinlashib, haqorat qilgan: erkakka Milananing qora roʻmoli va koʻylagi yoqmagan va shuning uchun uni «matryoshka» (bir birining ichiga solinadigan yogʻoch oʻyinchoq – tahr.) deb haqoratlagan va soʻng gʻoyib boʻlgan.

Biroq oradan koʻp oʻtmay erkak temir tayoq bilan qaytib kelib, homilador Milana va uning onasini kaltaklay boshlaydi. “Baza” xabariga koʻra, erkak homilador ayolning qorniga ham tayoq bilan bir necha marta urgan.

Hujum qilgan shaxs allaqachon qoʻlga olingan. Jabrlanuvchi esa kasalxonaga yotqizilgan, bolaning hayoti xavf ostida qolmoqda - homila qimirlamayapti, ammo yurak urishi szilmoqda.

Mazkur hujum Rossiya Davlat Dumasi vitse-spikeri, “Yangi xalq” partiyasidan deputat Vladislav Davankovning keng muhokama qilingan tashabbusi fonida yuz berdi. Davankov 28 may kuni taʻʻlim muassasalarida diniy liboslarni (roʻmol, hijob va niqob) tanlab taqiqlash boʻyicha qonunchilik tashabbusi bilan chiqqan edi.