10.01.2025 06:33
Жозеф Аун Ливаннинг янги президенти этиб сайланди
Ливан парламентида икки йилдан бери давом этаётган сиёсий инқироздан сўнг, Бош штаб раҳбари Жозеф Халил Аун мамлакатнинг янги президенти этиб сайланди. Парламентдаги 13-президентлик сайловининг иккинчи босқичида Аун 99 овоз тўплади. Бу 86 овозлик талабдан юқори бўлиб, унинг сайланишини таъминлади.
Мамлакат қонунчилигига кўра, Ливан президенти 128 ўринли парламентда камида учдан икки қисми овозини олиши лозим. Биринчи босқичда Аун 71 овоз олган эди. Парламент сессиясининг иккинчи босқичида 18 овоз ҳақиқий эмас, 9 бетараф ва 2 та бошқа номзодга берилган бўлди.
Ливанда президент лавозими 2022 йил 31 октябрда собиқ президент Мишел Ауннинг ваколат муддати тугаганидан буён бўш қолган эди. Сиёсий гуруҳлар ўртасидаги келишмовчиликлар ва хорижий давлатларнинг аралашуви сайлов жараёнини мураккаблаштирди. Ҳизбуллоҳ ва унга қарши сиёсий блоклар ўртасидаги қарама-қаршилик туфайли аввалги 12 сессияда президент сайланмаган.
Исроил ва Ливан ўртасидаги чегарада тўқнашувлар, шунингдек, Ғазодаги можаролар сайловни янада ортга сурган. Бироқ 2024 йил ноябрида ўт очишни тўхтатиш бўйича келишув ортидан сиёсий кун тартибига президентлик сайлови қайтди. Парламент раиси Набиҳ Берри 13-сессияни 2025 йил 9 январь куни ўтказишни эълон қилган эди.
Жозеф Халил Аун 1964 йилда Син эл-Фин шаҳрида туғилган. У 1983 йилда Ливан армиясига қўшилиб, 2017 йилда армия бош штаби раҳбари лавозимига тайинланган. Аун ҳарбий хизмат давомида кўплаб мукофотларга сазовор бўлган. У француз, инглиз ва араб тилларини билади, сиёсатшунослик, ҳарбий фанлар ва халқаро муносабатлар бўйича таълим олган.
Ливан конституциясига мувофиқ, президент мароний насроний бўлиши шарт. Мамлакатда парламент ўринлари мазҳабий гуруҳлар ўртасида тақсимланган, бу эса сиёсий консенсусга келишни қийинлаштиради. Жозеф Аун армиядан президентликка сайланган бешинчи шахсдир.