31.01.2025 15:05
368
Ўзбекистонда диний соҳадаги давлат сиёсати концепцияси ишлаб чиқилди
Олий Мажлис Қонунчилик палатаси депутатлари «Ўзбекистон Республикасида фуқароларнинг виждон эркинлигини таъминлаш ва диний соҳадаги давлат сиёсати концепцияси» лойиҳасини ишлаб чиқиб, биринчи ўқишда қабул қилди. Ҳужжат жамоатчилик муҳокамасига қўйилади.
Концепция фуқароларнинг виждон эркинлигини таъминлаш, турли дин вакиллари ўртасида тотувлик ва ҳурмат муҳитини яратиш, диний бағрикенглик ва дунёвийликни мустаҳкамлаш мақсадларига қаратилган.
Ҳужжатда давлат сиёсатининг 10 та асосий вазифаси белгиланган.
Фуқаролар тенглигини таъминлаш, дин асосида камситишга йўл қўймаслик.
Виждон эркинлигини ҳимоя қилиш, диний қарашларни мажбуран сингдиришга қарши чоралар кўриш.
Давлатнинг дунёвийлик тамойилларига таяниши ва диннинг давлат ишларига аралашмаслигини таъминлаш.
Экстремизм ва радикаллашувга қарши кураш, диний таҳдидларга барҳам бериш.
Диний ва дунёвий таълимни ривожлантириш, илм-фан ва маданият ютуқларидан фойдаланишни рағбатлантириш.
Концепция уч устувор йўналиш асосида амалга оширилади:
1. Виждон эркинлигини ҳимоя қилиш ва конфессиялараро муносабатларни мустаҳкамлаш.
2. Диншунослик ва диний тадқиқотларни ривожлантириш.
3. Экстремизм ва терроризмга қарши курашни кучайтириш.
Қонун лойиҳаси ташаббускори депутат Жаҳонгир Шириновга кўра, концепция ижтимоий барқарорликни таъминлаш ва диний саводхонликни ошириш учун муҳим.
Депутат Алишер Қодиров ҳужжатда баъзи талқинлар ва изоҳларни аниқлаштириш кераклигини билдирди ва иккинчи ўқишда бу камчиликлар тузатилиши мумкинлигини айтди.
Қонунчилик палатаси мазкур концепцияни жамоатчилик муҳокамасига қўйиш бўйича қарор қабул қилди. Ҳужжатнинг тўлиқ матни Олий Мажлис Қонунчилик палатасининг расмий сайтида эълон қилиниши кутилмоқда.