Тожикистон ва Қозоғистон уран қазиб олиш соҳасида ҳамкорлик қилиш тўғрисида келишиб олди

 Ҳужжат 22 август куни Қозоғистон президенти Қосим-Жомарт Тўқаевнинг Тожикистонга расмий ташрифи доирасида имзоланган.

Меморандум икки давлатнинг тоғ-кон саноати соҳасида стратегик ҳамкорликни кўзда тутади. Компаниялар “уран ва бошқа нодир ер металларини қидириш, қазиб олиш ва қайта ишлаш, тадқиқот ва ишланмалар, инновацион технологияларни жорий этиш ва кадрлар тайёрлаш каби ташаббуслар бўйича ҳамкорликда ишлашни” режалаштирмоқда.

"Казатомпром" Қозоғистоннинг уран, нодир металлар, атом электр станциялари учун ядро ёқилғиси импорти ва экспорти бўйича миллий оператори ҳисобланади. 2009 йилдан бери Қозоғистон табиий уран қазиб олиш бўйича дунёда етакчи бўлиб келмоқда. Шунингдек, ушбу мамлакат саноатдаги энг йирик уран захирасига эга. "Казатомпром" ўзининг шўба корхоналари, филиаллари ва қўшма корхоналари билан биргаликда 14 та уран қазиб олувчи корхоналарга бирлаштирилган 26 та конни ўзлаштирмоқда.

"Аниқ натижалар ҳақида гапиришга ҳали эрта бўлса-да, биз Қозоғистон ва Тожикистон учун катта фойда келтириши мумкин бўлган уран саноати, шунингдек, нодир ва нодир ер металлари бўйича истиқболли қўшма лойиҳаларга эътибор қаратмоқдамиз. Умид қиламизки, ушбу меморандум икки мамлакатда иқтисодий ўсиш ва юқори технологияларни ривожлантиришга кўмаклашувчи узоқ муддатли ва самарали ҳамкорлик учун асос бўлади”, — деди “Казатомсаноат” бошқаруви раиси Меиржан Юсупов.

Яқин келажакда “ТажРедМет” компанияси вакиллари Қозоғистонга жавоб ташрифи билан бориб, “Казатомпром”нинг ишлаб чиқариш қувватлари билан танишиш ниятида. Таъкидланишича, бу қўшма лойиҳаларни амалга оширишда муҳим қадам бўлиши кутилмоқда ва бу икки томоннинг ўз ишини баҳолаш, келгусидаги ҳамкорлик имкониятларини батафсилроқ кўриб чиқиш имконини беради.