03.12.2024 09:57
488
Зеленский уруш бошланганидан бери 80 мингдан кам украин аскари ҳалок бўлганини маълум қилди
Украина Қуролли Кучлари Россия билан кенг миқёсли уруш давомида 80 мингдан кам одамни йўқотди, дея маълум қилди Украина президенти Владимир Зеленский. “Яқинда кимдир менга Америка матбуотида 80 минг украиналик ҳалок бўлгани ҳақида хабар бергандек туюлди. Аммо мен сизга айтмоқчиманки, йўқ. Озроқ. Камроқ, анча”, деди Зеленский Kyodo News нашрига берган интервьюсида. Бироқ у аниқ рақамни ошкор этишдан бош тортди.
Украина 80 минг ҳарбий йўқотиши ҳақида аввалроқ Wall Street Journal (WSJ) Киевдаги манбаларига таяниб хабар берган эди. Уларнинг сўзларига кўра, ярадор ҳарбийлар сони 400 мингга етган Шу билан бирга, The Economist Ғарб разведка маълумотларига таяниб, Украина 60 мингдан 100 минггача ҳарбий хизматчини йўқотгани ва 400 мингга яқин аскари оғир яраланганини билдирди.
Ua Losses сайтида келтирилишича, 3 декабрь ҳолатига кўра, 65 289 нафар украиналик ҳарбий хизматчи ҳалок бўлган. Ҳалок бўлганларнинг ўртача ёши 38,2 ёшни ташкил этди. Ҳақиқий кўрсаткич анча юқори бўлиши мумкин, чунки ҳар бир ҳалок бўлганга 6 дан 8 нафаргача оғир ярадорлар тўғри келади.
Шу билан бирга, Пентагон маълумотларига кўра, ноябрь ойига келиб, Россиянинг умумий йўқотишлари 615 мингни ташкил этди: 115 минг киши ҳалок бўлди ва 500 минг киши яраланди. Россия Мудофаа вазирлиги охирги марта 2022 йил сентябрь ойида йўқотишларни эълон қилди - 5937 киши. Июнь ойида Россия президенти Владимир Путин Украина қуролли кучларининг йўқотишларини эълон қилди ва уларни Россия билан солиштирди. Унинг сўзларидан маълум бўлишича, 27 ойлик уруш давомида Россия 135 мингга яқин одамни йўқотган.