24.01.2025 08:06
340
Ҳусийлар қўлга олинган кема экипажини озод қилди
Яманнинг “Ансоруллоҳ” ҳаракати (ҳусийлар) 2023 йил 19 ноябрда қўлга олган Galaxy Leader юк кемаси экипажини озод қилди. Экипаж аъзоларининг озод қилинишига Уммоннинг воситачилиги сабаб бўлган. Бу ҳақда ТАСС агентлиги хабар берди.
Ҳусийларнинг олий сиёсий кенгаши баёнот бериб, экипаж озод қилинганини тасдиқлади. Маълумотларга кўра, 25 нафар денгизчи Уммонга етказилган. Улар Болгария, Мексика, Руминия, Украина ва Филиппин фуқаролари бўлган. Денгизчилар орасида Исроил ёки Япония фуқаролари йўқлиги таъкидланган.
Кема Багама ороллари ҳамдўстлиги байроғи остида ҳаракатланган ва Япониянинг Nippon Yusen компаниясига тегишли бўлган. Galaxy Leader кемасини ҳусийлар Адан кўрфази сувларида қўлга олиб, уни Яман қирғоқларига тортиб келган эди.
Эслатиб ўтамиз, олдинроқ АҚШ президенти Дональд Трамп Ҳусийлар гуруҳини террорчи ташкилот сифатида тан олиш ҳақидаги фармонни имзолаганди. 2021 йилда Байден маъмурияти Ҳусийларни террорчи ташкилотлар рўйхатидан чиқарган. Аммо уларнинг Исроилга қарши ҳаракатлари туфайли гуруҳ қайтадан "глобал террорчи ташкилотлар" рўйхатига киритилди.