10.01.2025 14:21
Трамп Путин билан учрашишга тайёрланмоқда
АҚШнинг сайланган президенти Доналд Трамп ва Россия президенти Владимир Путин ўртасида учрашув режалаштирилгани маълум бўлди. 9 январь куни Трамп республикачи губернаторлар билан учрашув олдидан, урушни тугатиш мақсадида Путин билан музокара ўтказиш ниятини билдирган.
“Президент Путин учрашмоқчи, биз буни ташкил қиламиз. Қонли урушни тугатишимиз керак”, деди Трамп Россиянинг Украинага бостириб кириши ҳақида. Бироқ музокаралар санаси ҳали аниқ эмас.
Трампнинг маъмурият давридаги тинчлик режалари Украина ҳудудларининг бир қисмини Россияга беришни назарда тутиши мумкин. Украина президенти Владимир Зеленский эса Трампни урушда ҳал қилувчи воситачи бўлиши мумкинлигини таъкидлаган.
Кремль матбуот котиби Дмитрий Песков Кремлга расмий сўров ҳали юборилмаганини маълум қилди ва музокаралар учун Трампнинг лавозимга киришини кутиш тўғри бўлишини айтди.