09.12.2024 08:56
443
Россияда тобутлар нархи 74 фоизга қимматлашди
Россия-Украина уруши бошланганидан бери Россияда тобутлар нархи 74 фоизга ошди, деб ёзди The Moscow Times Росстат маълумотларига таяниб. 2022 йил январида бир тобут тахминан 4437 рубль (50 доллар) турган бўлса, 2024 йилнинг октябрига келиб унинг нархи 7711 рублга (80 доллар) кўтарилган.
Нархларнинг тез ўсиши урушнинг биринчи ойларида бошланган ва 2022 йил сентябрида "қисман сафарбарлик" эълон қилинганидан кейин янги сакраш юз берган. Бутун 2022 йил давомида Россияда дафн маросими хизматлари нархи 48 фоизга, 2023 йилда яна 12 фоизга, 2024 йилнинг тўққиз ойида эса 10 фоизга ошди. Сахалин (181%), Омск вилояти (162%), Тамбов вилояти (104%) ва Смоленск вилояти (103%) каби баъзи ҳудудларда тобутлар нархи икки баробардан кўпроққа ошди.
Қайд этилишича, бу тўғридан-тўғри Украина фронтидаги россиялик ҳарбийларнинг ўлимига боғлиқ бўлиши мумкин, чунки бу ҳудудлар сафарбар қилинган ва шартнома бўйича аскарлар сони бўйича етакчилик қилади.
Дафн маросими хизматлари нархининг ошиши Россияда инфляциянинг умумий ўсиши билан бир вақтда кузатилди. Росстат маълумотларига кўра, жорий йилнинг ноябрида мамлакатда ойлик инфляция октябрга нисбатан 1,5 баравардан кўпроқ ўсган ҳолда барча рекордларни янгилади. 19 ноябрдан 25 ноябргача бўлган ҳафта давомида истеъмол нархлари индекси 0,36 фоизга, ой бошидан 1,15 фоизга, йил бошидан эса 8 фоиздан кўпроққа ўсди.
Айниқса, 2023 йил январидан бери биринчи марта озиқ-овқат маҳсулотлари нархининг 10 фоиздан ошгани сезиларли.
Украина Бош штаби маълумотларига кўра, уруш бошлангандан бери Россия деярли 750 минг аскарини йўқотган. Уларнинг катта қисми ҳалок бўлганлар, ярадорлар ва асирларни ташкил этади. Биргина ноябрь ойида қурбонлар сони рекорд даражада қайд этилган - 45 720 киши. Россия расмийлари бу рақамларни рад этади. Президент Владимир Путин аввалроқ Украина Қуролли Кучларининг (АФУ) йўқотишлари Россияникидан беш баравар кўп эканлигини таъкидлаган эди.