РФ президенти Курск вилоятига ҳужумни "кенг кўламли провокация" деб атади

“Киев режими навбатдаги кенг кўламли провокацияни амалга оширди ва турли хил қуроллардан, жумладан, ракеталардан тинч аҳоли бинолари, турар-жой бинолари, тез ёрдам машиналарини ўққа тутмоқда”, — деди давлат раҳбари ҳукумат аъзолари билан учрашувда.

Владимир Путин учрашувдан сўнг дарҳол ҳуқуқ-тартибот идоралари, Мудофаа вазирлиги, Бош штаб, ФСБ раҳбарлари билан учрашув ўтказишини ҳамда уларнинг Курск вилоятидаги вазият юзасидан навбатдаги ҳисоботларини эшитишини таъкидлади. .

“Аммо шуни айтмоқчиманки, Курск вилояти губернатори вазифасини бажарувчи билан суҳбат натижасида бир қатор фуқаролик идораларига вилоят аҳолисига зарур ёрдам кўрсатиш бўйича топшириқлар берилди ва ҳукуматдан ҳам сўрайман. Буни зудлик билан ҳал қилиш керак”, - деди Путин.

Маълумот учун, 7 августга ўтар кечаси Украина қўшинлари Россиянинг Курск вилоятида чегарани бузиб ўтишга уринди.

Россия Мудофаа вазирлигига алоқадор “"Рыбарь” Телеграм-каналининг маълум қилишича, Курск вилоятининг шимоли-ғарбий қисмида украиналик ҳарбийлар Леонидовка чеккасига етиб борган, Николаево-Дарьино – Дарьино – Нижний Клин чегарасидан уч километрдан зиёдроқ чуқурликка ўтган. Улар Обуховская, Покровский, Толстой Луг ва Любимовка аҳоли пунктлари устидан назорат ўрнатган, шунингдек, Россиядан Европага газ ўтказилаётган Суджа газ ўлчаш станциясини эгаллаб олишган. Суджа шаҳри катта ёнғин остида қолган.

РФ Мудофаа вазирлиги маълумотларига кўра, Украина Қуролли кучларининг 300 га яқин аскари, 11 та танк ва 20 та зирҳли техникаси Россия-Украина чегарасига бевосита туташган Николаево-Дарйино ва Олешня ҳудудларида россиялик чегарачиларга ҳужум қилган.

"Жанговар тўқнашувлар ҳудудига Россия қўшинлари гуруҳи захиралари Курск йўналиши бўйлаб ҳаракатланди. Ўт очиш натижасида Украина Қуролли кучларининг ўн олтита зирҳли техникаси, жумладан, олтита танк, иккита пиёдалар жанговар машинаси, тўртта бронетранспортёр, учта «Козак» зирҳли жанговар машинаси ва бир муҳандислик тўсиғи йўқ қилинди”, — дейилади хабарда.

7 август куни, вазирликнинг хабар беришича, Россия Қуролли кучлари бўлинмалари Россия ФСБ чегара идоралари билан биргаликда “Курск ҳудудларида Украина Қуролли кучларининг қуролли тузилмаларини йўқ қилишда давом этган.

Баёнотда айтилишича, Украинанинг Суми вилояти Басовка, Журавка, Юнаковка, Беловодий, Кияница, Корчаковка, Новая Сич, Павловка, Городишче аҳоли пунктлари ҳудудларига ҳаводан, ракета ва артиллериядан зарбалар берилган. Украина бирликлари Россия ҳудудига чуқур кириб бормаслиги учун «операция» давом этаётгани, бу ҳақда қўшимча хабар берилиши айтилди.

Курск вилояти губернатори вазифасини бажарувчи Алексей Смирнов кечаси телефон орқали Путинга оператив вазият ҳақида хабар берган. Смирнов, шунингдек, вилоятга ихтисослашган шифокорлар, жумладан, анестезиолог ва реаниматологлар, нейрохирург, торакал жарроҳ, болалар жарроҳи, фельдшерлар келганини қайд этди.

Курск вилояти кўп тармоқли клиник шифохонаси бош шифокорининг жарроҳлик ишлари бўйича ўринбосари, вилоятнинг бош жарроҳи Андрей Локтионов эрталаб Курск вилоятига содир этилган оммавий ҳужумлар натижасида жароҳатланганлар сони 28 нафарга етганини маълум қилди.

Россия давлат матбуотининг ёзишича, Курск вилоятидаги ҳужумлар натижасида 5 киши ҳалок бўлган, яна 24 киши яраланган.

Белгороднинг «Ашес» нашри хабарига кўра, Украина Қуролли Кучлари қўшинлари камида олти нафар россиялик ҳарбийни асирга олган. Украинанинг Телеграм-каналлари уларнинг баъзилари билан видеоларни тарқатди. Айтилишича, маҳбуслар орасида муддатли ҳарбий хизматга чақирилганлар ҳам бор.

Украина қўшинларининг йўқотишлари

РФ Мудофаа вазирлиги маълумотларига кўра, Украина Қуролли кучлари Курск давлат чегараси ҳудудида 260 аскари ва 50 та зирҳли техника, шу жумладан 7 та танк, 8 та бронетранспорт, 3 та пиёда жанговар техникаси, 31 та зирҳли жанговар техникасини йўқотган.

Шунингдек, «Бук-М1» зенит-ракета мажмуасининг иккита ўзиюрар ўқ отиш мосламаси, УР-77 минадан тозалаш мосламаси ва электрон уруш станцияси йўқ қилинган.