Путин: Россия доим Исроил-Фаластин можаросини тинч йўл билан ҳал этиш тарафдори бўлиб келган

Россия ҳар доим Исроил-Фаластин можаросини тинч йўл билан ҳал этиш тарафдори бўлиб келган. Бу ҳақда РФ президенти Владимир Путин Ново-Огарёвода Фаластин раҳбари Маҳмуд Аббос билан музокарада айтиб ўтди.

“Сиз билан умумий позицияга эгамиз, бу муаммонинг илдизлари узоқ ўтмишга бориб тақалади ва аввал халқаро ташкилотлар даражасида, биринчи навбатда, БМТ даражасида мустақил Фаластин давлатини яратиш бўйича қабул қилинган қарорларни менсимаслик билан боғлиқ”, - деди у.

Путин РФнинг ушбу масала бўйича позицияси «ўзгаришсиз» эканлигини таъкидлади. “У узоқ вақт олдин тузилган ва ҳеч қандай вазиятга боғлиқлик хусусиятига эга эмас. Минтақада узоқ муддатли, ишончли, барқарор тинчликни таъминлаш учун БМТнинг барча қарорларини амалга ошириш ва биринчи навбатда, тўлақонли Фаластин давлатини яратиш зарур, деб ҳисоблаймиз”, — деди Россия президенти.

“Ҳамма яхши биладики, Россия бугун, афсуски, ўз манфаатларини ҳимоя қилиши, ўз халқини қўлида қурол билан ҳимоя қилиши керак, аммо Яқин Шарқда, Фаластинда содир бўлаётган воқеалар, албатта, бизнинг эътиборимиздан четда қолмайди”, деб қўшимча қилди Россия президенти.

Путин, шунингдек, Россия “Фаластинда юз берган гуманитар фалокатни катта алам ва хавотир билан кузатаётганини” таъкидлади.

“Ўз навбатида, биз Фаластин халқини қўллаб-қувватлаш учун ҳамма нарсани қиламиз. Биласиз, 700 тоннага яқин турли юк жўнатдик. Биз Фаластин халқини қўллаб-қувватлаш учун ҳар қандай имкониятдан фойдаланиш учун бор имкониятни ишга соламиз. Биринчи навбатда, тинч аҳоли ўртасидаги йўқотишлардан хавотирдамиз. БМТ маълумотларига кўра, бу рақам аллақачон 40 минг кишига етди ва улар асосан аёллар ва болалардир", - деди Путин.

Ўз навбатида, Маҳмуд Аббос Россия ҳар доим қонун тарафида, ҳақиқат тарафида эканлигини ва “Фаластин халқининг энг азиз дўстларидан бири” эканини айтди.

Айни пайтда Аббос АҚШ босими туфайли БМТнинг Фаластин масаласидаги бузғунчи ролига эътибор қаратди.

“1947 йилдан бери БМТ Бош Ассамблея ва Хавфсизлик Кенгашида Фаластин муаммоси бўйича мингдан ортиқ резолюция қабул қилди, аммо Қўшма Штатлар босими туфайли у охир-оқибат ўз миссиясини бажаролмади ва Фаластин халқининг ҳуқуқларини амалга оширишни таъминлайдиган бирорта ҳам резолюцияни қабул қилмади”, деди Аббос.

Унинг сўзларига кўра, Фаластин ҳукумати ҳам фаластинликларни ўз ҳудудларидан мажбуран чиқариб юборишга уринишларни номақбул деб ҳисоблайди.

“Биз [Исроил] фаластинликларни Ғазо секторидан, Ғарбий Соҳилдан, Қуддусдан мажбуран кўчириш сиёсатини давом эттиришни қабул қилмаймиз – бу стратегия ўтган асрда бир неча бор амалга оширилган: масалан, 1948 йилда ёки 1967 йил”, - деди Аббос.

Халқаро суд томонидан қабул қилинган резолюциялар Исроилнинг халқаро гуманитар қонунларга тўғри келмайдиган қадамларидан воз кечиши зарурлигини кўрсатади, дея қўшимча қилди у.

Мавзуга алоқадор

Энг кўп ўқилган

Тавсия қилинган