03.02.2025 14:55
423
Нетаньяхунинг рафиқасига жиноий иш очилди
Исроил бош вазири Бинямин Нетаньяхунинг рафиқаси Сара Нетаньяху суд жараёнига аралашиш ва муҳим гувоҳларга қарши кампания ташкиллаштиришда гумонланмоқда. Исроил давлат прокуратураси 2 февраль куни мазкур жиноий тергов бошланганини расман эълон қилди.
Тергов 12-каналнинг журналистик суриштирувидан кейин бошланган. Унга кўра, Сара Нетаньяху бош вазирнинг собиқ ёрдамчиси Ханни Блейвайсдан Бинямин Нетаньяху иши бўйича гувоҳлик бериши керак бўлган Хадас Кляйнга қарши онлайн кампания ташкил қилишни сўраган.
Прокуратура ушбу ҳолатни жиддий кўриб чиқиб, полиция ва кибержиноятчиликка қарши кураш бўлими ходимларини терговга жалб қилган.
Сара Нетаньяху аввал ҳам судга тортилиб, 2019 йилда давлат маблағларини ноқонуний ишлатганликда айбдор деб топилган ва 15 минг доллар жарима тўлаган эди.
Шунингдек, 2024 йил ноябрда Халқаро жиноий суд Бинямин Нетаньяхуни Ғазо секторидаги ҳарбий жиноятлар ва инсониятга қарши жиноятларда гумон қилиб, уни ҳибсга олишга ордер берган эди. 2025 йил 27 январда эса у порахўрлик, фирибгарлик ва жамоатчилик ишончини суиистеъмол қилиш бўйича суд эшитувларида иштирок этиш учун Тел-Авив округ судига келган.