21.11.2024 12:26
Исроил Сурияга сўнгги ойлардаги энг қонли ҳужумни амалга оширди
Исроил Суриянинг Палмира шаҳрига ҳалокатли зарба берди. Портлаш оқибатида 36 киши ҳалок бўлди, 50 киши яраланди, деб хабар бермоқда Arab News.
Сурия инсон ҳуқуқлари обсерваториясининг маълум қилишича, зарбада 61 киши ҳалок бўлган. Ташкилот маълумотларига кўра, улардан 33 нафари қуролли тузилмаларга, жумладан, 4 нафари “Ҳизбуллоҳ” билан алоқадор, 22 нафари Сурия фуқароси эмас ва 2 нафар жасаднинг шахси аниқланмаган.
“Душман Исроил ал-Танфдан ҳаво ҳужумини уюштирди ва Палмирадаги бир қатор биноларга зарба берди. 36 киши ҳалок бўлди, 50 киши яраланди, катта моддий зарар етказилди”, — дейилади Сурия Мудофаа вазирлиги хабарида.
Бу Исроилнинг Ливанга тажовузи бошланганидан бери Сурияга қилинган энг қонли зарба бўлди.
Сурия Ташқи ишлар вазирлиги “Сионизмнинг минтақа давлатлари ва халқларига қарши давом этаётган жиноятларини акс эттирувчи Палмирага қилинган шафқатсиз ҳужумни” қоралади.
Қадимий Палмира шаҳри ЮНЕСКОнинг Бутунжаҳон мероси рўйхатига киритилган. Исроилнинг сўнгги зарбаларидан сўнг Сурия қадимий обидалар ва музейлар бошқармаси бош директори тарихий обидаларга зарар етганлигини аниқлаш учун зарбалар берилган жойда текширув ўтказиш зарурлигини айтди.