17.12.2024 11:47
589
Исроил Ирландиядаги элчихонасини ёпди
Исроил ҳукумати якшанба куни мамлакатнинг Ирландиядаги элчихонасини ёпиш ҳақида қарор қабул қилди. Бу қарор Ирландия ҳукумати томонидан Фаластин давлатининг тан олиниши ва Исроилга қарши халқаро ҳуқуқ доирасидаги ҳаракатларни қўллаб-қувватлаши ортидан қабул қилинди.
2024 йил май ойида Ирландия расман Фаластин давлатини тан олди. Шунингдек, ўтган ҳафта Ирландия Жанубий Африка томонидан БМТнинг Халқаро судида Исроилга қарши қўзғатилган даъвога қўшилишини маълум қилди. Ирландия ташқи ишлар вазирлиги Ғазо секторидаги Исроил ҳаракатларини “жамоавий жазо” ва халқаро ҳуқуқни бузиш деб баҳолади.
Ирландиянинг баёнотига кўра, улар халқаро суддан “геноцид” тушунчасини давлат томонидан амалга ошириладиган жиноятлар учун кенгроқ талқин қилишни сўраган. Ирландия ташқи ишлар вазирлиги бундай чекланган талқин инсон ҳуқуқларини ҳимоя қилишни сусайтириши ва жазосизликка олиб келиши мумкинлигини таъкидлади.
Исроилнинг Ирландиядаги элчиси Гидеон Саар бу ҳаракатларни “антисемитизм ва Исроил давлатининг мавжудлигини шубҳа остига қўйиш” деб атади. Исроил ташқи ишлар вазирлиги Ирландия ҳукумати ҳаракатларини икки томонлама стандартларга асосланганликда ва яҳудий давлатини масхара қилишда айблади.
Ирландиянинг бош вазири Саймон Харрис Исроилнинг элчихона ёпиш қарорига ўз муносабатини билдириб, буни "афсусланарли ва нохуш ҳолат" деб атади. У Ирландиянинг Исроилга қарши позицияга эга эмаслигини таъкидлаб, икки давлат – Исроил ва Фаластиннинг тинч-тотув яшашини қўллаб-қувватлашини билдирган.
Исроилнинг бу қарори икки давлат ўртасидаги муносабатлардаги жиддий кескинликнинг яна бир ифодаси бўлиб, бу минтақавий ва халқаро сиёсий вазиятга таъсир кўрсатиши мумкин. Ирландиянинг Исроилга қарши халқаро ҳаракатларни қўллаб-қувватлаши Ғарб давлатлари ўртасида ҳам турли муносабатларни келтириб чиқариши мумкин.