Исломни қабул қилган португал ва румин қизлар исломофобия ҳақида сўз очди
Истанбулда таҳсил олаётган португалиялик Мариана Тавареш ва руминиялик Мария Сирбу Исломни қабул қилганидан кейин ўз ватанларида тўқнаш келган исломофобия ҳақида ҳикоя қилиб берди.
Уларнинг айтишича, мусулмонлар томонидан кўрсатилган яхши хулқ ва шахсий намуналар уларнинг диний стереотиплардан чиқишига сабаб бўлган.
Мариана Тавареш илгари жуда кескин исломофоб бўлганини тан олди:
“Мен Исломга қарши қатъий фикрда эдим. Насроний воиз бўлганман, ҳатто исроилни* фаол қўллаб-қувватлаганман. Мен учун бу ички ўзгариш тарихи жуда ғайриоддий бўлди”, деди у.
Унинг фикрича, исломофобия кўпинча жоҳилликдан келиб чиқади. Мариана мусулмонлар Қуръонга мувофиқ яшаса, бутун дунёга Исломнинг нақадар гўзал дин эканини амалда кўрсатишини таъкидлаб ўтди.
“Гўзал хулқли мусулмон уни кўрган инсон учун энг кучли даъватдир. ОАВда қандай кўрсатилишидан қатъи назар, айнан шундай мусулмонлар одамлар фикрини ўзгартиради”, – дейди Мариана.
Руминиялик Мария Сирбу эса Исломга бўлган қизиқишининг айнан исломофобик қарашлардан бошланганини айтиб ўтди.
“Мен 2019 йилда исломни қабул қилдим. Ҳаммаси қизиқиш билан бошланди: нега ислом ҳақида, ҳижобли аёллар ҳақида фақат салбий гаплар айтилади? Ўрганишни бошладим. Қуръонни ўз тилимда ўқидим, Ислом ва аёллар ҳуқуқлари ҳақидаги китобларни кўриб чиқдим. Ва билсам, менга айтилганларнинг бари ёлғон экан”.
Мария Исломни қабул қилиш жараёни осон бўлмаганини қўшимча қилди:
“Бир куни масжидга бориб, дуо қилдим. "Эй Аллоҳим, агар Ислом ҳақ йўл бўлса, менга уни кўрсат", дедим. Ўша кеча тушимда муслима бўлганимни ва ҳижоб кийганимни кўрдим. Эртасига яна масжидга бордим ва шаҳодат келтирдим”.
Исломни қабул қилгач эса Мария босим ва камситишларга дуч келган.
“Менга кўпчилик ҳижобга кирганинг, муслима бўлганинг учун энди иккинчи ёки учинчи хотин бўласан, оилада сенга ҳурмат қилишмайди, дейишди. Эсласам, жуда оғир кунлар эди”, дейди у.
