19.11.2024 13:35
Бомбаланаётган Ғазо: 410-куннинг асосий воқеалари
Исроил Ғазо секторида босқинчилик ва қирғинбарот урушини бошлаганига 410 кун бўлди. 24 соат давомида Ғазо сектори, Иордан дарёсининг Ғарбий соҳили ҳамда бутун Яқин Шарқ ҳудудида содир бўлган асосий воқеалар.
▪️Босқинчилар Рафаҳ, Хон Юнис, Байт Лаҳия ва Нусайрат лагерига ҳужум қилди. Бир кунда 50 киши ҳалок бўлди. Уруш бошланганидан буён 43 922 киши шаҳид бўлди.
▪️Босқинчилар 2500 га яқин қочқинларни Байт Лаҳиядаги мактабни тарк этишга мажбур қилди. 49 киши ҳибсга олиниб, номаълум жойга олиб кетилган.
▪️Ал-Қассам бригадалари Ғазо шимолидаги Байт Лаҳия ҳудудида 5 та ишғол аскарини йўқ қилди. Рафаҳ ва Бурейж лагеридаги аскарлар ҳужумга учради.
▪️Ғарбий Соҳилда ишғолчилар Наблус, Женин, Қалқиля ва Тулкармга бостириб кирди. Наблусда босқинчилар 18 ёшли ўсмирни ўлдирди. Женин шаҳрида қаршилик кучлари ва босқинчилар ўртасида шиддатли жанглар кетмоқда.
▪️"Ҳизбуллоҳ" Тел-Авив, Наҳария, Кирят Шмона шаҳарларига ракета ҳужумларини уюштирди. Жумладан, Тель-Авивга йўлланган ракета зарбаси оқибатида беш киши жароҳатланди. Шфарамда уч қаватли турар жой биносига ракета тушиб, 41 ёшли аёл ҳалок бўлди, 10 киши жароҳатланди.
▪️Ливан Соғлиқни сақлаш вазирлиги: кеча тунда Исроилнинг Байрут марказидаги бозорни бомбалаши натижасида 5 киши ҳалок бўлди, 31 киши яраланди.
▪️Ғазо полицияси томонидан ўтказилган махсус амалиётда гуманитар ёрдам ортилган юк машиналарини талон-торож қилган тўдага аъзо 20 фаластинлик ҳалок бўлди.
▪️G20 саммити иштирокчилари Ғазо ва Ливанда кенг қамровли ўт очишни тўхтатишни қўллаб-қувватлади.