28.05.2025 10:30
61
АҚШ талаба визасини олмоқчи бўлганларнинг ижтимоий тармоқ саҳифаларини текширмоқчи
Дональд Трамп маъмурияти АҚШда ўқиш учун ариза топширган барча чет эллик талабаларнинг ижтимоий тармоқ саҳифаларини текширувдан ўтказиш масаласини кўриб чиқмоқда, дея хабар берди Politico манбаларига таянган ҳолда.
Шу муносабат билан маъмурият АҚШ элчихоналари ва консуллик бўлимларига талаба визаси талабгорлари учун янги суҳбатларни режалаштиришни тўхтатишни буюрган.
Қайд этилишича, мазкур ҳолат талабалар визасини расмийлаштиришни кескин секинлаштириши мумкин. Шунингдек, бу асосан чет эллик талабалар ҳисобига даромад кўрадиган кўплаб университетларга зарар етказиши эҳтимоли бор.
«Бу дарҳол кучга кирадиган бўлиб, ижтимоий тармоқларда талаб қилинадиган скрининг ва текширувни кенгайтириш режасига тайёргарлик кўриш мақсадида консуллик бўлимлари кейинги кўрсатмалар берилгунга қадар қўшимча талаба ёки алмашинув дастури иштирокчилари (F, M, ва J тоифали визалар) учун виза суҳбати тайинлаш имкониятларини амалга оширмасликлари лозим. Биз бу ҳақдаги қўшимча йўриқномаларни яқин кунлар ичида алоҳида хабар орқали юборишни кутмоқдамиз», — дейилади давлат котиби Марко Рубио имзолаган кўрсатмада.
Рубионинг телеграммасида талабаларда айнан қандай маълумотлар текширилиши айтилмаган, бироқ Трампнинг терроризм ва антисемитизмга қарши курашга қаратилган фармонлари тилга олинган.
Politico нашрининг қайд этишича, Трамп маъмурияти аввалроқ ҳам ижтимоий тармоқларни текшириш талабларини киритган, бироқ улар Исроилнинг Ғазо секторидаги ҳаракатларига қарши норозилик намойишларида иштирок этиши мумкин бўлган хорижлик талабаларга қаратилганди.
Аввалроқ АҚШ ҳукумати Гарвард университетини чет эллик талабаларни қабул қилиш ҳуқуқидан маҳрум қилиб, таълим муассасасини «зўравонлик, антисемитизмни қўзғатиш ва Хитой Коммунистик партияси билан ҳамкорлик қилиш»да айблаганди.