Ташқи ишлар вазири Бахтиёр Саидов 12−13 март кунлари Кобулга ташриф буюриб, Афғонистон муваққат ҳукуматининг юқори мартабали вакиллари билан икки томонлама ҳамкорликнинг кенг кўламли масалалари, жумладан, иқтисодий алоқаларни фаоллаштириш масалаларини муҳокама қилди. Бу ҳақда вазирнинг Telegram каналида хабар берилди.

Бахтиёр Саидовнинг ТИВ раҳбари сифатида Афғонистонга илк ташрифида унга Ўзбекистон ҳукумати ва хусусий сектори вакиллари ҳамроҳлик қилди.

Бахтиёр Саидова Афғонистон бош вазири в. б. Мулла Муҳаммад Ҳасан Охунд билан

Вазир Афғонистон муваққат ҳукуматининг бир қатор мансабдор шахслари — бош вазир в. б. Мулла Муҳаммад Ҳасан Охунд, бош вазир ўринбосари в. б. Мавлавий Абдул Салом Ҳанафий, бош вазирнинг иқтисодий масалалар бўйича ўринбосари в. б. Мулла Абдул Ғани Бародар, ташқи ишлар вазири в. б. Мавлавий Амир Хон Муттақий, ички ишлар вазири в.б. Халифа Сирожиддин Ҳаққоний, савдо ва саноат вазири в. б. Нуриддин Азизий билан учрашувлар ўтказди.

“Музокаралар чоғида ўзаро ҳамкорликнинг кенг кўламли масалаларини муҳокама қилдик. Иқтисодий алоқаларни мустаҳкамлаш, ишбилармон доиралар ўртасидаги муносабатларни яхшилаш учун энг қулай шарт-шароитларни яратишга алоҳида эътибор қаратдик”, - дейилади хабарда.

«Бизни бой ва муштарак тарихимиз, умумий анъаналаримиз ва келажагимиз бирлаштиради. Биргаликда амалга оширишимиз мумкин бўлган кўплаб имкониятлар мавжуд», — дея таъкидлади Бахтиёр Саидов.

Мулла Абдул Ғани Бародар матбуот хизматининг ёзишича, у “Афғонистон Ислом Амирлигининг иқтисодий йўналтирилган ташқи сиёсат юритиш истагини таъкидлаб, минтақавий алоқаларга алоҳида эътибор қаратди. Бу мақсадга эришиш учун минтақавий ҳамкорлик, айниқса, Ўзбекистон билан ҳамкорлик қилиш зарурлигини таъкидлади”.

Мулла Бародар Афғонистон ва Ўзбекистон орқали транзит ташиш даражасини ошириш, савдо алоқаларини ривожлантириш, темир йўл тармоғини кенгайтириш, Афғонистонга сармоя киритиш, транспорт ва божхона муаммоларини ҳал этиш, Ўзбекистонда истиқомат қилаётган афғонларни қўллаб-қувватлаш зарурлигини таъкидлади.

Шунингдек, у ёшларга олий таълим олиш имкониятини яратиш бўйича биргаликдаги саъй-ҳаракатларни алоҳида қайд этди.

Мулла Абдул Ғани Барадар Охунд сув хўжалиги ва қишлоқ хўжалигини ривожлантириш масалаларини муҳокама қилар экан, Афғонистон шимолидаги Қўштепа канали ҳақида гапириб ўтди.

“Бу афғон халқининг азалий орзуси бўлиб, у узоқ давом этган можаролар ва беқарорлик бу орзунинг рўёбга чиқишига тўсқинлик қилмоқда. У Амударё ҳавзасидаги бошқа мамлакатларда бўлгани каби, дарёдан ҳам адолатли фойдаланиш тарафдори экани, Ислом амирлиги тикланиши билан каналда тараққиёт бошлангани, қўшни давлатларни хавотирга солмаган ҳолда афғонларнинг ҳуқуқлари таъминланганини таъкидлади”, - дейилади хабарда.

Қайд этилишича, Ўзбекистон ташқи ишлар вазири Бахтиёр Саидов мамлакат Афғонистон билан сиёсий ва иқтисодий алоқаларни мустаҳкамлаш тарафдори эканини тасдиқлаган. У Ўзбекистонга канал ва замонавий суғориш тизимларини қуриш лойиҳаси бўйича техник ёрдам кўрсатишни таклиф қилди, дейилади хабарда.

Бахтиёр Саидов ва Афғонистон ташқи ишлар вазири в. б. Мавлавий Амир Хон Муттақий

Афғонистон ТИВ матбуот хизмати, шунингдек, вазирлар музокараларда савдо ва транзит масалалари, жумладан, иқтисодий ҳамкорликни кенгайтириш мақсадида ишбилармонлар ва транспорт ходимларига визалар беришни соддалаштириш масалаларига ҳам тўхталганини билдирди.

Мавлавий Амир Хон Муттақий Ўзбекистондан импорт қилинадиган электр энергияси тақчиллиги масаласини кўтариб, қишда бу оддий аҳолига ҳам, иқтисодиёт тармоқларига ҳам таъсир қилишини таъкидлади.

Бахтиёр Саидов Ўзбекистон доимо Афғонистонни қўллаб-қувватлаб келганини айтиб, уни Марказий Осиё ва халқаро ҳамжамиятнинг бир қисми сифатида кўришга чақирди.

Шунингдек, Афғонистонда цемент ишлаб чиқариш, кўмир қазиб олиш ва кўмир асосида электр энергияси ишлаб чиқариш соҳаларига сармоя киритишга қизиқиш борлигини таъкидлади.