Қозоғистонда АЭС қурилиши бўйича референдум 6 октябрда ўтказилади
Қозоғистон президенти Қосим-Жомарт Тоқаев 6 октябрь куни мамлакатда атом электр станциясини қуриш бўйича референдум ўтказилишини маълум қилди. Тоқаев парламент қуйи ва юқори палаталарининг қўшма мажлисида референдум ўтказиш санасини маълум қилди.
“Глобал энергия тақчиллиги кучайиб бораётганини
ҳисобга олсак, ишончли ва экологик тоза энергия манбаларига жуда муҳтожмиз,
шунинг учун, менимча, атом энергетикасини ривожлантиришга катта эътибор қаратишимиз
лозим. Ушбу турдаги ишлаб чиқариш жадал ўсиб бораётган иқтисодиётимиз эҳтиёжларини
сезиларли даражада қондиради”, — дея унинг сўзларидан иқтибос келтирди Tengrinews.
Қозоғистон президенти “мамлакат ҳаёти учун муҳим
бўлган ҳар бир қадам халқ қўллаб-қувватлаши билан ташланиши керак”лигини
таъкидлади. Унинг сўзларига кўра, бугун референдум ўтказиш санасини белгилаш
тўғрисидаги фармонни имзолайди.
Эслатиб ўтамиз, Қозоғистонда Балхаш кўли қирғоғидаги
Олмаота вилоятининг Улкен қишлоғида атом электр станциясини қуришни режалаштирилган.
Ҳукумат станция қурилиши билан мамлакат нафақат тоза, балки арзон электр
энергиясини ҳам олишига ваъда бермоқда, бу эса паст тарифларни сақлашга ёрдам
беради.
Лойиҳа мухолифлари ҳам экологик, ҳам сиёсий
сабабларни келтирмоқда. Уларнинг фикрича, АЭСни Россиянинг «Росатом» компанияси
қуради, бу эса Қозоғистонни Россияга янада қарам қилиб қўяди ва ҳарбий тўқнашув
юзага келган тақдирда, уни нишонга айлантириши мумкин.
Мавзуга алоқадор
-
Қозоғистонда халқ референдумида АЭС қурилиши маъқулланса, ушбу лойиҳага давлат бюджетидан 10-12 млрд доллар ажратиш режалаштирмоқда. Қозоғистон президенти Қосим-Жомарт Тўқаев 2023 йилнинг сентябрь ойида АЭС қуриш масаласини умумхалқ референдумига қўйишни таклиф қилган эди. АЭСнинг 20235 йилгача фойдаланишга топширилиши айтилмоқда.
-
Қозоғистон ҳукумати Балхаш кўли бўйида атом электр станцияси қуриш бўйича умумхалқ референдумини ўтказиш тўғрисида қарор қабул қилди. Референдум тахминан жорий йилнинг кузида ўтказилади. “Мамлакат ядро ёқилғиси ишлаб чиқаришнинг тўлиқ циклини деярли якунлади ва кичик реакторлар билан ишлаш тажрибасига эга. Керакли кадрлар мавжуд, мутахассислар доимий равишда тайёрланмоқда”, – деди мамлакат бош вазири Олжас Бектенов.
