Мисрда ўзбек тилини ўрганиш бўйича янги дарслик яратилди

Ўзбекистон элчихонаси томонидан инглиз тилида соддалаштирилган услубда ўзбек тилини нолдан ўргатувчи "Uzbek Language: Complete Self-Study Guide in 22 Lessons" номли қўлланма чоп этилди, деб хабар қилмоқда "Дунё" АА.

Маълум қилинишича, бундан ташқари 2500 дан ортиқ фаол қўлланиладиган сўзлар асосида ўзбекча-инглизча луғат ҳам чоп этилган.

Элчихона ташаббуси билан нашрга тайёрланган мазкур китоб ҳозирда Мисрдаги кутубхоналар, ўзбек тилини ўрганаётган Қоҳира университети талабалари орасида тарқатилмоқда.

Шунингдек, мамлакатимизнинг хориждаги дипломатик ваколатхоналари орқали ўзбек тили ўқитиладиган хорижий университетларга ҳам етказиш режалаштирилган.

Қўлланманинг кириш қисмида ўзбек тилининг ўзига хос хусусиятлари, унинг ўзгариш босқичлари ҳамда ўзбек халқининг шаклланиш тарихи ҳақида сўз юритилган.

Ундаги 22та дарслар эса, хорижий тилни ўрганиш учун энг зарур бўлган қоидалар ва конструкцияларни ўргатишга бағишланган.

Қўлланма охирида тил ўрганишни осонлаштирувчи қўшимча қисмлар ҳам киритилган.

Масалан, ўзбек тили шевалари ва уларнинг фарқлари тушунтирилган ҳамда халқ орасида ишлатиладиган, лекин адабий тилга киритилмаган баъзи кенг фойдаланиладиган ўзлашма сўзлар ҳам мазкур китобга илова қилинган, дейилади хабар матнида.