Туркия Саудиянинг ҳаво ҳужумидан мудофаа тизимини кучайтирмоқда

Франциянинг Intelligence Online разведка журнали хабар беришича, Туркиянинг Aselsan компанияси Саудия Арабистонининг улкан NEOM лойиҳаси учун ҳаво ҳужумидан мудофаа (HHM) тизимини ишлаб чиқиш билан шуғулланади. Бу лойиҳа “Vision 2030” стратегияси доирасида амалга оширилмоқда.

Мазкур қарор эвропалик ракета ишлаб чиқарувчи MBDA компанияси таклифларини рад этиш ва унинг ўрнига Туркия томонидан таклиф қилинган янада мақбул тизимни танлашни англатади, дейилади хабарда. 

Саудия Арабистони HHM лойиҳасининг асоси сифатида Туркиянинг “Пўлат гумбаз” (Çelik Kubbe) тизими кўрилмоқда. Бу лойиҳа 2024 йил август ойида расмий равишда ишга туширилган.

Мазкур тизим исроилнинг “Темир гумбаз”идан фарқли равишда, кўп даражали мудофаа тизими сифатида лойиҳалаштирилган. Агар Исроил тизими ўрта масофадаги таҳдидларни бартараф этишга мўлжалланган бўлса, Туркиянинг “Пўлат гумбази” янада кенг қамровли ва илғор технологияларни ўз ичига олади.