Turkiyada mehmonxonadagi yongʻinda kamida 10 kishi halok boʻldi

Turkiyaning Bolu viloyatidagi togʻ-changʻi kurortida yuz bergan yirik yongʻinda kamida 10 kishi halok boʻldi, 30 dan ziyod kishi jarohatlandi.

Turkiyaning Bolu viloyatidagi togʻ-changʻi kurortida yuz bergan yirik yongʻinda kamida 10 kishi halok boʻldi. Bu haqda respublika Ichki ishlar vazirligi rahbari Ali Erlikaya X ijtimoiy tarmogʻida maʻʻlum qildi.

Favqulodda hodisa «Karlakay» mehmonxonasida tungi soat uchlar atrofida sodir boʻlgan.

Dastlabki maʻʻlumotlarga koʻra, yongʻin restoran joylashgan qavatda sodir boʻlgan. Bu qavatda 230 dan ortiq kishi istiqomat qilgan, deya xabar beradi “Anadolu”.

Avvalroq olti kishi halok boʻlgani, ularning barchasi Turkiya fuqarolari ekani aniqlangan edi. Hozirda qurbonlar soni 10 kishiga etdi. Yaradorlar soni 30 kishidan oshdi. Shifokorlar ularning hayotlari uchun kurashmoqda.

Ayni paytda huquq-tartibot idoralari tomonidan hodisaning sabab va oqibatlari oʻrganilmoqda.