TIV: "Oʻzbekiston fuqarolari dunyoning istalgan nuqtasida davlat himoyasida"

Oʻzbekiston Tashqi ishlar vazirligi (TIV) "Oʻzbekiston fuqarolari dunyoning istalgan nuqtasida davlat himoyasida" ekanini bildirdi.

"Oʻzbekiston Konstitutsiyasi, milliy qonunlar va xalqaro huquqning umumeъtirof etilgan printsiplari hamda normalariga asosan, Oʻzbekiston fuqarolari dunyoning istalgan nuqtasida boʻlishidan qatъi nazar, davlat himoyasida ekanini taъkidlaydi", deyiladi vazirlik bayonotida. 

Qayd etilishicha, agar fuqarolarning huquqlari, erkinliklari, qonuniy manfaatlari yoki qadr-qimmati xorijda buzilsa, ular darhol qabul qiluvchi davlatning vakolatli huquq-tartibot organlariga murojaat qilishlari zarur. 

Shuningdek, TIV fuqarolar Oʻzbekistonning diplomatik vakolatxonalari yoki konsullik muassasalariga huquqiy va konsullik yordami soʻrab murojaat qilishi mumkinligini bildirgan. 

"Fuqarolarimizni xorijda himoya qilish davlat siyosatining muhim yoʻnalishi ekanini hamda bu masъuliyat davlatning oʻz fuqarolari oldidagi majburiyatlari asosida amalga oshirilishini yana bir bor eslatib taъkidlaymiz", deyiladi bayonotda. 

Oldinroq, ijtimoiy tarmoqlarda rossiyalik shaxs oʻzbekistonlik mehnat muhojiri – taksi haydovchisini haqorat qilayotgani aks etgan video tarqalgandi. Videoda rossiyalik kimsa haydovchiga: "Sen ruslarning qulisan! Oʻzbekistonda hech narsa yoʻqligi uchun bizning xizmatimizni qilishga kelgansan", deya kurakda turmaydigan soʻzlar bilan haqorat qilgandi. Ushbu tasvirlar ijtimoiy tarmoqlarda keng muhokamalarga sabab boʻldi.