Qozogʻiston oligarxlar pullari toshqin oqibatlarini bartaraf etishga yoʻnaltiriladi

Qozogʻistonda xorijda noqonuniy yoʻllar bilan pul yuvishga uringan oligarxlardan tortib olingan 40 milliard tengedan (90 million dollar) ziyod mablagʻ ijtimoiy dasturlar, jumladan, mamlakat shimolida roʻy bergan suv toshqinlari oqibatlarini bartaraf etishga sarflanishi maʻʻlum qilindi.

Qozogʻiston oligarxlardan tortib olingan 90 million dollarning bir qismini suv toshqini muammolarini hal qilish uchun ishlatmoqchi, deb yozmoqda Yeni Şafak nashri.

Qayd etilishicha, oʻtgan yil davomida Qozogʻistonning noqonuniy aktivlarini qaytarish komissiyasi qozogʻistonlik oligarxlar xorijda noqonuniy yoʻllar bilan pul yuvishga uringan 40 milliard tengedan (90 million dollar) ortiq mablagʻni mamlakat byudjetiga qaytarishga muvaffaq boʻlgan.

Qozogʻiston ommaviy axborot vositalari xabariga koʻra, respublika hukumati bu mablagʻlarni ijtimoiy dasturlarga sarflashga qaror qilgan. Unga koʻra, mablagʻning asosiy qismi Qozogʻiston shimolidagi suv toshqini qurbonlariga yoʻnaltiriladi. Komissiya, shuningdek, 7 milliard tenge (15,8 million dollar) miqdorida investitsiya shartnomalarini tuzishni maʻʻqulladi. Shu tariqa, rasmiylar aktivlarni qaytarish boʻyicha qonunga boʻysunuvchi oligarxlarni Ostona va Chimkentda ikkita infratuzilma obʻʻekti qurish majburiyatini yuklashga qaror qildi.

“Aktivlarni qaytarish boʻyicha olib borilayotgan ishlar davlat rahbarining ijtimoiy adolatni tiklash yoʻlidagi yoʻnalishining bevosita timsolidir. Qaytarilgan barcha mablagʻ Qozogʻiston xalqi manfaati uchun sarflanmoqda”, — dedi Qozogʻiston bosh vaziri Oljas Bektenov.

Ostona va Chimkentdagi loyihalar nafaqat infratuzilmani rivojlantirishga, balki respublika uchun iqtisodiy oʻsish dvigateliga aylanishga qaratilgan. Hukumat yangi ish oʻrinlari yaratish va soliq tushumlarini koʻpaytirishdan ikki tomonlama foyda kutmoqda: iqtisodiy oʻsishni ragʻbatlantirish bilan birga dolzarb ijtimoiy muammolarni hal qilish.

26 aprelʻ kuni bosh vazir matbuot xizmati mamlakat shimoli va markazidagi toshqinlardan jabr koʻrgan 12 642 oilaga hukumat tomonidan tovon puli toʻlangani haqida xabar berilgan edi. Bugungi kunga qadar jabrlangan hududlar aholisidan yordam soʻrab 21 658 ta murojaat kelib tushgan. Oxirgi ikki hafta ichida rasmiylar 468 ta uyda taʻʻmirlash ishlari uchun 645 million tengedan (1,5 million dollar) koʻproq mablagʻ ajratdi.

Qozogʻiston fuqaro muhofazasi xizmatlari Atirau, Aqtoʻbe, Gʻarbiy Qozogʻiston va Shimoliy Qozogʻiston viloyatlarida suv toshqini oqibatlarini bartaraf etishda davom etmoqda. Suv toshqinlari shu hafta choʻqqisiga chiqishi, 1 maydan boshlab mintaqada suv sathining bosqichma-bosqich pasayishi kutilmoqda.

Avvalroq Qozogʻiston FVV mamlakatda suv toshqini tufayli 6,5 mingdan ortiq odam evakuatsiya punktlarida qolayotgani, mutaxassislar Atirau, Aqtoʻbe, Gʻarbiy Qozogʻiston va Shimoliy Qozogʻiston viloyatlarida suv toshqinlarini bartaraf etish va aholiga yordam koʻrsatish ishlarini davom ettirayotganini maʻʻlum qilgan edi.