Oʻzbekiston hukumati “Umra” faoliyatini tashkil etish va oʻtkazish boʻyicha talablarni kuchaytarishga qaratilgan qarorni qabul qildi. Unga koʻra, ushbu faoliyatni olib boruvchi tadbirkorlarga voyaga etmagan fuqarolarga xizmat koʻrsatmaslik, 1 mln AQSh dollari miqdordagi mablagʻni “Ziyorat” jamgʻarmasiga zaxira qilib qoʻyish hamda oʻz faoliyatini turoperator va turagentlar orqali amalga oshirmaslik kabi talablar qoʻyildi.

Oʻzbekiston hukumati 12 oktyabrʻ kuni 668-sonli Vazirlar Mahkamasi qarori bilan “Umra” tadbirlarini tashkil etish va oʻtkazish bilan bogʻliq chora-tadbirlarni yanada takomillashtirish toʻgʻrisidagi qarorni qabul qildi. Bu haqda Din ishlari boʻyicha qoʻmita axborot xizmati xabar berdi.

Qayd etilishicha, ushbu qarordan koʻzlangan maqsad “Umra” tadbirlarini tashkil etish va oʻtkazish uchun litsenziya olish talablarini belgilash, ziyoratchilarga amallarni munosib va xavfsiz bajarishlari uchun shart-sharoitlar yaratish, ularning huquqlari va qonuniy manfaatlarini himoya qilish, shuningdek, sifatli va kafolatlangan xizmatlardan foydalanishini taʻʻminlashdan iborat.

Hujjat bilan “Umra” tadbirlarini tashkil etish va oʻtkazish faoliyati uchun litsenziya yakka tartibdagi litsenziya turi hisoblanishi hamda litsenziyalarni berish tanlov asosida Din ishlari boʻyicha qoʻmita tomonidan 2024 yil oktyabr oyidan amalga oshirilishi belgilandi.

Quyidagi litsenziya talab va shartlari joriy etilmoqda:

ziyoratchilarga guruh rahbari etib Oʻzbekiston musulmonlari idorasi bilan tuziladigan shartnoma asosida diniy bilim va koʻnikmalarga ega boʻlgan mutaxassisni tayinlash;

shtatida diniy taʻʻlim yoʻnalishlari boʻyicha taʻʻlim muassasasi yoki Oʻzbekiston xalqaro islom akademiyasining bitiruvchisi boʻlgan kamida bir nafar mutaxassisning mavjudligi;

voyaga etmagan fuqarolarga xizmat koʻrsatmaslik;

1 mln AQSh dollari miqdordagi mablagʻni “Ziyorat” jamgʻarmasiga zaxira qilib qoʻyish;

oʻz faoliyatini turoperator va turagentlar orqali amalga oshirmaslik;

ziyoratchilar uchun Saudiya Arabistoni Podshohligining faqat “Umra” vizasini rasmiylashtirish. Bunda, "Umra" vizasidan tashqari viza bilan fuqarolarni olib borish noqonuniy faoliyat hisoblanadi;

“Umra” xizmatlarini Saudiya Arabistonidagi hamkor tashkilot oʻrtasida imzolanadigan shartnomaga muvofiq amalga oshirish hamda ular tomonidan koʻrsatiladigan xizmatlar uchun toʻlovlarni bank muassasalari orqali amalga oshirish;

ziyoratchilarga “Umra” amallarini bajarishlari uchun zarur shart-sharoitlar yaratish va sifatli “Umra” xizmatlarini koʻrsatish, shuningdek, Saudiya Arabistonining Makka va Madina shaharlarida ziyoratchilarga oʻz vaqtida tibbiy xizmat koʻrsatishni tashkil etish;

xalqaro yoʻnalishlarda yoʻlovchi va yuk tashish boʻyicha 2 yildan kam boʻlmagan tajribaga ega hamda ushbu davr mobaynida yoʻlovchi tashishning xalqaro va milliy qonunchilik talablarini buzmagan aviakompaniyalar bilan hamkorlik qilish, shuningdek, ziyoratchilarni yuborishdan oldin ularga borish-kelish aviachiptalarini xarid qilish;

ziyoratchilarni toifasi 3 yulduzdan kam boʻlmagan mehmonxonalarga joylashtirish;

“Umra” xizmatini uchinchi davlatlar orqali koʻrsatmaslik;

“Umra” xizmatini litsenziyada koʻrsatilgan manzildan boshqa joyda joylashgan vakolatxona va filial orqali amalga oshirmaslik;

Shuningdek, “Umra” tadbirlarini tashkil etish va oʻtkazish boʻyicha faoliyat uchun litsenziya olish sohasidagi huquqbuzarliklar uchun yuridik shaxslarga solinadigan jarimalar miqdorlari BHMning 200 baravari (75 mln soʻm) etib belgilangan.

Diniy qoʻmita “Umra” tadbirlarini tashkil etish va oʻtkazishga oid xizmatlarini litsenziyaga ega boʻlmagan tadbirkorlik subʻʻektlari tomonidan koʻrsatish taqiqlanganidan ogohlantirdi.

Shuningdek, fuqarolarga Din ishlari boʻyicha qoʻmita ziyoratchilarimizni "Umra" amallarini munosib va xavfsiz bajarishlari uchun ogoh boʻlishlari va keyinchalik turli koʻngilsiz holatlarga tushib qolmasliklari maqsadida ishonchli va kafolatlangan xizmatlardan foydalanishlarini tavsiya etildi.