Mintaqadagi birinchi kam quvvatli atom elektr stantsiyasi Oʻzbekistonda Rossiya texnologiyasi asosida quriladi. Bu haqdagi hujjatlar, avval xabar qilinganidek, Rossiya prezidenti Vladimir Putinning Oʻzbekistonga davlat tashrifi chogʻida 27 may kuni imzolandi.

Vazirlar Mahkamasi huzuridagi Atom energetikasi agentligining AES qurish direktsiyasi va «Atomstroyeksport» kompaniyasi («Rosatom» injiniring boʻlimi) Oʻzbekistonda kam quvvatli atom elektrostantsiyasi (KQAS) qurish boʻyicha shartnoma tuzdi. Bundan tashqari, 2018 yil 7 sentyabrdagi Oʻzbekiston hududida atom elektr stantsiyasini qurish boʻyicha hamkorlik toʻgʻrisidagi hukumatlararo bitimga oʻzgartirishlar kiritish toʻgʻrisidagi bayonnoma imzolandi.

Atom energetikasi agentligi va «Rosatom» press-relizida aytilishicha, QQAS 330 MVt quvvatga ega (har biri 55 MVt quvvatga ega oltita rektor) boʻladi va Jizzax viloyatida quriladi. Stantsiya qurilishida «Rosatom» bosh pudratchi boʻladi, Oʻzbekiston kompaniyalari ham ishtirok etadi.

Maydonda qurilish ishlari yozda boshlanadi. «Tanlangan maydon allaqachon tekshirilgan, yaroqliligi va xavfsizligi tasdiqlangan, bu loyihani amalga oshirish vaqtini sezilarli darajada qisqartiradi», — deyiladi press-relizda.

«Prognozlarga koʻra, Oʻzbekistonda 2050 yilga borib energiya resurslariga boʻlgan talab qariyb ikki baravar koʻpayadi va, koʻrinib turibdiki, energetika tizimining barqaror ishlashi va iqtisodiyotning rivojlanishi uchun mamlakatimiz oʻzini qayta tiklanadigan energiya manbalaridan tashqari, asosiy energiya manbalari bilan ham taʻʻminlashi kerak», — dedi Atom energetikasi agentligi direktori Azim Axmedxadjaev.

«Biz hozir butun dunyoda ham yuqori quvvatli atom elektr stantsiyalarini qurish, ham kichik modulli reaktorlar loyihalari nuqtai nazaridan yangi yadro quvvatlarini yaratishga qiziqish ortib borayotganini koʻrmoqdamiz. „Rosatom“ bilan hamkorlikni kengaytirish esa energetika kompleksimizni atom energetikasidagi ilgʻor texnologiyalar bilan mustahkamlash imkonini beradi, deb hisoblaymiz», — deya qoʻshimcha qildi u.

«Rosatom» uchun bu KQAS qurish boʻyicha birinchi eksport shartnomasidir. «Va bu shunchaki dastlabki kelishuv emas, biz shu yozning oʻzidayoq qurilishni boshlaymiz», — dedi «Rosatom» davlat korporatsiyasi bosh direktori Aleksey Lixachyov.

Avval yozganimizdek, Shavkat Mirziyoev kelishuvga izoh berar ekan, shunday dedi: «Dunyodagi deyarli barcha etakchi davlatlar oʻz energetik xavfsizligi va barqaror rivojlanishini atom energetikasi hisobiga taʻʻminlamoqda. Agar biz Oʻzbekistonning yangi taraqqiyot bosqichiga chiqish istiqbollari haqida oʻylasak, katta miqdordagi uran zaxiralariga ega va uni uchinchi davlatlarga eksport qilayotgan mamlakatimiz uchun bu loyiha hayotiy ahamiyatga ega».