Istanbuldagi katolik cherkoviga uyushtirilgan hujum ortidan Rossiya va Tojikiston fuqarolari hibsga olindi

Istanbulning Sarier tumanidagi Santa Maria katolik cherkoviga niqobli ikki qurollangan shaxs hujum qilishi oqibatida bir kishi halok boʻldi. Hujum ortidan 47 kishi, jumladan, ikki nafar xorijlik – Rossiya va Tojikiston fuqarolari qoʻlga olingan.

28 yanvarʻ kuni tushdan keyin, yakshanba ibodati vaqtida Istanbulning Sarier tumanidagi Santa Maria katolik cherkoviga niqobli ikki qurolli shaxs hujum qildi. Ular ibodatchilarga qarata oʻq uzgan, soʻng voqea joyidan qochib ketgan. Bir kishi halok boʻldi.

“Holat boʻyicha keng koʻlamli surishtiruv ishlari boshlandi va hujumchilarni qoʻlga olish harakatlari olib borilmoqda. Biz bu jirkanch hujumni keskin qoralaymiz”, ‑ dedi mamlakat ichki ishlar vaziri Ali Erlikaya. U hujum yuzasidan tergov boshlanganini qoʻshimcha qildi.

Istanbuldagi katolik cherkoviga uyushtirilgan hujumdan keyin 47 kishi, jumladan, ikki nafar xorijlik – Rossiya va Tojikiston fuqarolari qoʻlga olindi.

IIV rahbarining soʻzlariga koʻra, Tojikiston va Rossiya fuqarolari “Islomiy davlat” tashkilotiga (bir qator davlatlar tomonidan terrorchi deb tan olingan) aloqador. Guruh avvalroq hujum uchun javobgarlikni oʻz zimmasiga olgan edi.

"Cherkovga qilingan hujumdan soʻng darhol politsiya keng koʻlamli operatsiyani boshladi. Yakshanba kuni 30 ta manzilda 47 kishi qoʻlga olindi", dedi Erlikaya brifingda.

Turkiya hukumati qurolli hujumni qoraladi. Istanbul gubernatori Dovut Gul va Turkiya prezidenti Rajab Toyyib Erdoʻgʻon voqea munosabati bilan hamdardlik bildirdi. Erdoʻgʻon gumondorlarning tez orada qoʻlga olinishiga umid qilishini aytdi.