Britaniya tashqi ishlar vaziri Markaziy Osiyo davlatlariga tashrifini boshladi

Britaniya tashqi ishlari vaziri Devid Kemeron Markaziy Osiyo davlatlari va Moʻgʻilistonga tashrifini boshladi. Britaniya TIV rahbari ilk bor Tojikiston va Qirgʻizistonda boʻldi. Oʻzbekistonga esa oxirgi marta 1997 yilda tashrif buyurgan.

Britaniya tashqi ishlari vaziri Devid Kemeron Markaziy Osiyo davlatlari va Moʻgʻilistonga tashrifini boshladi. Dastlab, 22 aprelʻ kuni Tojikistonda boʻlib, mamlakat rahbariyati bilan muzokaralar oʻtkazdi. Soʻngra shu kuni kechqurun Bishkekka yoʻl oldi.

Tojikistonga tashrif

Tashrif doirasida Kemeron Tojikiston prezidenti Emomali Rahmon bilan uchrashdi, deya xabar beradi Tojikiston prezidenti saytida. Uchrashuvda Tojikiston va Britaniya oʻrtasidagi hamkorlik masalalari muhokama qilindi.

“Biz Britaniyani Gʻarbiy Evropadagi muhim hamkor deb bilamiz. Mamlakatimiz Qirollik bilan koʻp qirrali munosabatlarni rivojlantirish va mustahkamlashga katta eʻʻtibor qaratmoqda”, — dedi Rahmon.

Suhbat chogʻida ikki mamlakat oʻrtasidagi siyosiy, iqtisodiy, savdo va madaniy-gumanitar sohalardagi munosabatlar muhokama qilindi. Uchrashuvning muhim mavzularidan biri parlamentlararo aloqalarni kengaytirish boʻldi.

Tojikistonning togʻ-kon sanoati, metallurgiya, engil, oziq-ovqat, farmatsevtika va qishloq xoʻjaligi sohalariga Qirollikdan sarmoya jalb etish zarur deb topildi. Tomonlar, shuningdek, “yashil energiya” ishlab chiqarish va “yashil iqtisodiyot”ga oʻtish yoʻlida hamkorlikni rivojlantirishdan manfaatdorligini bildirdi.

Suv va iqlim muammolarini hal qilish, mehnat migratsiyasi, davlatlar oʻrtasida havo yoʻllari ochishda mamlakatlar oʻrtasida hamkorlikni yoʻlga qoʻyish muhokama qilindi.

Uchrashuvda Tojikiston va Britaniyaning mintaqada xavfsizlik va barqarorlikni taʻʻminlash borasidagi hamkorligi masalasiga ham toʻxtab oʻtildi.

Devid Kemeron Tojikiston tashqi ishlar vaziri Sirojiddin Muxriddin bilan ham uchrashdi.

Tomonlar ikki tomonlama hamkorlik kun tartibidagi asosiy masalalarni koʻrib chiqdilar. Qayd etilishicha, ushbu uchrashuv doirasida vazirlar Tojikiston va Buyuk Britaniya oʻrtasida kelgusida Dushanbe va London oʻrtasida toʻgʻridan-toʻgʻri aviaqatnovlarni ochish uchun asos yaratuvchi havo qatnovi toʻgʻrisidagi hukumatlararo bitimni imzolashdi.

Devid Kemeron Tojikistonga tashrifi doirasida “Nurek” GES faoliyati bilan ham tanishdi. Devid Kemeronning soʻzlariga koʻra, yirik ekologik loyihalar, shuningdek, siyosiy, iqtisodiy, tijorat va madaniy-gumanitar masalalar boʻyicha hamkorlikni kengaytirish imkoniyati mavjud.

“Kichik biznesni qoʻllab-quvvatlash uchun investitsiya jamgʻarmasini yaratish, iqlimga sarmoyalar kiritish, Tojikiston Respublikasida va umuman, Markaziy Osiyo davlatlarida har bir oʻqituvchi va ingliz tilini sevuvchilar misolida ingliz tilini oʻrganuvchi shaxslarni qoʻllab-quvvatlash imkoniyati mavjud”, - dedi u.

Qirgʻizistonga tashrif

Devid Kemeron 22 aprelʻ kuni Tojkistondagi tashrifini yakunlab, Bishkekka etib keldi. Shu kunning oʻzida Qirgʻiziston tashqi ishlar vaziri Jeenbek Kulubaev bilan uchrashuv oʻtkazdi.

Kemeron Qirgʻizistonning iqtisodiy sohada Xitoy boshchiligidagi hamkorlari borligini va mamlakat hamkor tanlash huquqiga ega boʻlishi kerakligini taʻʻkidladi. Uning qoʻshimcha qilishicha, Qirgʻiziston rahbariyati bilan bugungi uchrashuvda ikki davlat oʻrtasidagi hamkorlik muhokama qilingan va uni rivojlantirish uchun imkoniyatlar mavjud.

Kemeron Qirgʻizistonning suv resurslariga boy ekanligini taʻʻkidlab, iqlim oʻzgarishi sharoitida ekologik loyihalarni qoʻllab-quvvatlash zarurligini, shu munosabat bilan Britaniya oʻrta va kichik biznesni qoʻllab-quvvatlash uchun sarmoya fondi tashkil etishini qoʻshimcha qildi.

Bundan tashqari, u Qirgʻiziston bilan xususiy sarmoya sohasida hamkorlik qilayotganini taʻʻkidlab, Bishkekdagi stadion qurilishida Britaniya kompaniyalari ishtirok etayotganini aytdi.

Tashrif doirasida Devid Kemeron Qirgʻiziston prezidenti Sadir Japarov bilan ham uchrashgani maʻʻlum qilindi.

Prezident maʻʻmuriyatining maʻʻlum qilishicha, tomonlar oʻrtasidagi suhbat Qirgʻiziston-Britaniya ikki tomonlama hamkorligi, jumladan, siyosiy, savdo-iqtisodiy, sarmoyaviy, energetika va transport sohalaridagi hamkorlik istiqbollari haqida boʻlgan.

Bundan tashqari, ikki mamlakat oʻrtasida taʻʻlim va mavsumiy mehnat migratsiyasi masalalari boʻyicha oʻzaro hamkorlikni kengaytirish imkoniyatlari muhokama qilindi. Sadir Japarov va Devid Kemeron mintaqaviy va xalqaro kun tartibidagi dolzarb mavzularni eʻʻtiborsiz qoldirmadi.

Bu Britaniya tashqi ishlar vazirining Qirgʻizistonga ilk tashrifidir.  

Oʻzbekiston

23 aprelʻ kuni Britaniya tashqi siyosat mahkamasi rahbari Devid Kemeron Toshkentga keldi. Ayni paytda Oʻzbekiston Tashqi ishlar vazirligida martabali mehmonning mamlakatimiz tashqi siyosat idorasi rahbari Baxtiyor Saidov bilan muzokarasi boshlandi, deb xabar bermoqda OʻzA.

Taʻʻkidlanishicha, uchrashuvda mintaqaviy xavfsizlik, taʻʻlim, iqlim oʻzgarishi, ikki tomonlama savdo hamda biznes aloqalarini rivojlantirish masalalari muhokama etiladi.

Maʻʻlumot uchun, Britaniya tashqi ishlar vaziri Oʻzbekistonga oxirgi marta 1997 yil fevralida tashrif buyurgan. Oʻsha vaqtda mazkur lavozimda Malkolʻm Rifkind faoliyat koʻrsatgan.

Qozogʻiston

“2024 yilning 24-25 aprelʻ kunlari Britaniya va Shimoliy Irlandiya Birlashgan Qirolligi tashqi ishlar, hamdoʻstlik va taraqqiyot ishlari vaziri Devid Kemeron Qozogʻiston Respublikasiga tashrif buyuradi”, — deyiladi Qozogʻiston Tashqi ishlar vazirligi.

TIV maʻʻlumotlariga koʻra, Ostonada Devid Kemeron mamlakat rahbariyati tomonidan qabul qilinadi va bosh vazir oʻrinbosari – tashqi ishlar vaziri Murat Nurtleu bilan muzokaralar oʻtkazadi.

“Forin-ofis” rahbari Turkmanistonga tashrifidan soʻng Moʻgʻilistonga boradi.