"Zelenskiydan soʻra": BAA Netanyaxuning falastinlik ishchilarga pul toʻlash soʻrovini rad etdi

Isroil bosh vaziri Benʻyamin Netanyaxu 7 oktyabrʻdan soʻng Isroilga kirishi taqiqlangan Gʻarbiy Sohildagi falastinliklarga ishsizlik nafaqasini toʻlashni soʻrab BAAga murojaat qildi. BAA rahbari esa unga pulni Zelenskiydan soʻrashni tavsiya qildi.

BAA prezidenti shayx Muhammad ibn Zayd Ol Nahayon Isroil bosh vaziri Benʻyamin Netanyaxuning 7 oktyabrʻ kuni HAMAS hujumidan soʻng Isroil hududiga kirishi taqiqlangan, bosib olingan Gʻarbiy Sohildagi falastinlik ishchilarga «ishsizlik» nafaqasi toʻlash haqidagi iltimosini rad etdi. Bu haqda Isroilning Azios nashri ushbu hodisadan xabardor rasmiy manbaga tayanib xabar qildi.

Shayx Muhammad ibn Zayd Ol Nahayon Netanyaxuga kinoya oʻlaroq Gʻarbdan katta miqdorda moliyaviy yordam olayotgan Ukraina prezidentiga ishora qilib, "Zelenskiydan soʻra", deb aytgan.

Isroillik rasmiyning fikricha, ushbu rad javobi koʻplab arab davlatlarining Isroilning urushdan soʻng Gʻazo va Gʻarbiy Sohilda status kvoni (urushdan oldingi nazorat – tahr.) saqlab qolishi uchun toʻlamasligini anglatadi.

Isroil nima uchun BAAdan yordam soʻradi?

HAMAS bilan bogʻliq mojarodan soʻng Isroil hukumati xavfsizlik nuqtai nazaridan Isroil hududida Gʻarbiy Sohildan kelib mehnat qilayotgan 100 mingdan ziyod falastinliklarni oʻz hududiga kirishini taqiqlab qoʻydi.

Falastin iqtisodiyotining yomonlashib borayotgani va urush tufayli ishsizlikning ortishi Isroil xavfsizlik kuchlari va Bayden maʻʻmuriyati oʻrtasida bunday sharoitlar Gʻarbiy Sohilda zoʻravonlik holatlarining kuchayishiga olib kelishi mumkinligi haqidagi qoʻrquvni kuchaytirdi.

Oʻta millatchi moliya vaziri Bezalel Smotrich boshchiligidagi Isroil Iqtisodiy Vazirlar Mahkamasi Isroil Mudofaa vazirligining baʻʻzi falastinlik ishchilarni Isroilga kirishiga ruxsat berish taklifini rad etdi.

Isroil mudofaa kuchlari va Shin Bet xavfsizlik agentligining bosimiga qaramay, Netanʻyaxu Smotrich va boshqa radikal oʻng qanot vazirlar isteʻʻfoga chiqish bilan tahdid qilganidan keyin bu masalani xavfsizlik kabinetida ovozga qoʻymaslikka qaror qildi.

Koalitsiya aʻʻzolariga toʻqnash kelmasdan muammoga echim topishga harakat qilgan Netanʻyaxu boshqa davlatlarni Falastin ishchilariga ishsizlik nafaqasi berishni soʻrab murojaat qilishga majbur boʻldi.