Trampni yana otishdimi?

 

15 sentyabrʻ, yakshanba kuni AQShning Florida shtati Vest Palm-Bich shahridagi Donalʻd Trampning golʻf klubi yaqinida otishma yuz berdi. Voqeadan xabardor Reuters manbalariga koʻra, bir nechta oʻq uzilgan.

Sobiq prezident saylovoldi shtabi vakili Stiven Chung siyosatchi jarohat olmaganini maʻʻlum qildi. “Prezident Tramp unga yaqin joyda oʻq uzilganidan keyin xavfsiz. Hozircha qoʻshimcha tafsilotlar yoʻq”, — deyiladi siyosatchi shtab-kvartirasi bayonotida.

Associated Press xabariga koʻra, Tramp golʻf oʻynayotgan vaqtda Maxfiy xizmat agenti gumonlanuvchiga quroldan oʻq uzgan. Sherif matbuot kotibining aytishicha, otishmada hech kim jabrlanmagan.

The New York Times gazetasining yozishicha, ikki nomaʻʻlum shaxs sobiq prezidentga emas, bir-biriga qarata oʻt ochgan.

Trampning golʻf klubiga oʻq uzgan shaxs avvalroq qoʻlga olingan edi, dedi sobiq prezidentning oʻgʻli, kichik Donalʻd Tramp. “Mahalliy huquq-tartibot idoralari maʻʻlumotlariga koʻra, butalar orasidan AK-47 avtomati topilgan”, — deb yozdi u X ijtimoiy tarmogʻida.

AQSh Maxfiy xizmati matbuot kotibi Entoni Guglielmi X ijtimoiy tarmogʻida Tramp xavfsiz ekanligini tasdiqladi. Shuningdek, u Maxfiy xizmat voqea yuzasidan tergov boshlaganini maʻʻlum qildi.

Associated Press xabariga koʻra, Oq uy prezident Jo Bayden va vitse-prezident Kamala Xarris bu voqeadan xabardor boʻlganini hamda Tramp jarohat olmaganidan “xotirjamlik his qilganini” bildirgan.

Eslatib oʻtamiz, 13 iyulʻ kuni Butler shahrida (Pensilʻvaniya shtati) saylovoldi tashviqoti chogʻida Donalʻd Trampga suiqasd uyushtirilgan edi. Maʻʻlum boʻlishicha, 20 yoshli Tomas Kruks ismli yigit siyosatchi nutq soʻzlayotgan joydan 120 metr uzoqlikdagi bino tomidan miting ishtirokchilariga qarata oʻq uzgan.

Otishmada bir kishi halok boʻldi va bir necha kishi yaralandi, jumladan Trampning oʻzi ham oʻng qulogʻidan jarohat oldi. Oʻq uning qulogʻini tilib oʻtdi. Maxfiy xizmat xodimlari hujumchini yoʻq qildi. Kruksning jasadi yonidan AR-15 rusumli yarim avtomatik miltiq topilgan.

Federal qidiruv byurosi bergan maʻʻlumotlarga koʻra, hujumchi uzoq vaqt davomida hujumga tayyorgarlik koʻrgan. Bir yildan koʻproq vaqt davomida u portlovchi moslama yasash uchun qurol va materiallar sotib olgan.