Tojikiston shimolida kondagi oʻpirilish oqibatida uch kishi halok boʻldi

Tojikiston shimolidagi Soʻgʻd viloyatining Ayniy tumanida joylashgan Fon-Yagnob koʻmir konida oʻpirilish oqibatida uch kishi halok boʻldi. Hodisaga xavfsizlik qoidalarining buzilishi yoki hududdagi togʻ jinslarining beqarorligi sabab boʻlgan boʻlishi mumkin.

Tojikiston shimolidagi Soʻgʻd viloyatining Ayniy tumanida joylashgan Fon-Yagnob koʻmir konida oʻpirilish oqibatida uch kishi halok boʻldi. Bu haqda Tojikiston Favqulodda vaziyatlar va fuqarolik mudofaasi qoʻmitasi xabar berdi.

Qoʻmita xabariga koʻra, qutqaruv ishlarini olib borish uchun voqea joyiga Favqulodda vaziyatlar qoʻmitasining Soʻgʻd viloyati boʻyicha kon qutqaruvchilari safarbar etilgan.

Voqea joyiga etib borgan qutqaruvchilar 1978, 1983 va 1984 yillarda tugʻilgan 3 nafar konchining jasadlarini kondan chiqarib olishdi. Jasadlar tuman kasalxonasiga etkazilgan.

Qutqaruvchilarning soʻzlariga koʻra, hozirda konning qulashi sabablari vakolatli organlar tomonidan oʻrganilmoqda.

Dastlabki maʻʻlumotlarga koʻra, hodisaga xavfsizlik qoidalarining buzilishi yoki koʻmir qazib olinadigan hududdagi togʻ jinslarining beqarorligi sabab boʻlishi mumkin.