Tojikiston muhojirlar huquqlari poymol etilayotgani yuzasidan Rossiyaga talabnoma yubordi

Tojikiston Inson huquqlari boʻyicha vakili (ombudsman) Umid Bobozoda rossiyalik hamkasbi Tatʻyana Moskalʻkovaga Rossiyada mehnat qilayotgan migrantlarning huquqlari poymol etilayotgani yuzasidan xavotir bildirilgan talabnoma yubordi.

«OAV va ijtimoiy tarmoqlar xabarlaridan maʻʻlum boʻlishicha, ayni paytda Rossiya Federatsiyasi hududida mehnat muhojirlarining hujjatlari qonuniyligi tekshirilmoqda. Ijtimoiy tarmoqlarda eʻʻlon qilingan videomateriallarda huquqni muhofaza qiluvchi organlar xodimlari muhojirlarga nisbatan qoʻpollik, kaltaklash, haqorat kabi taqiqlangan usullarni qoʻllayotganini koʻrish mumkin. Biz muhojirlarning huquq va erkinliklari buzilayotganidan xavotirdamiz», – deyiladi talabnomada.

Bobozoda, shuningdek, tojikistonliklar, xususan, davlat xizmatchilari, talabalar, keksalar, ayollar va bolalar Rossiya chegarasida uzoq vaqt hibsda qolayotgani, ularga zarur shart-sharoitlar yaratib berilmayotganini ham tanqid qilgan.

Tojikiston ombudsmani rossiyalik hamkasbiga oʻz mamlakati fuqarolarining haq-huquqlariga rioya etish muhimligini eslatib, bu kabi holatlarni monitoring qilishda koʻmak soʻragan.

5 oktyabrda ham Tojikiston bosh vaziri Kohir Rasulzoda Rossiya bosh vaziri oʻrinbosari Marat Xusnullin bilan uchrashuvda Rossiyada tojikistonliklarning asosiy huquq va erkinliklar buzilayotgani masalasini koʻtargandi.

«Rossiyada migratsiya sohasini tartibga solish boʻyicha chora-tadbirlar davomida fuqarolarimizning asosiy huquq va erkinliklarining keng miqyosda buzilishi tendentsiyasidan xavotirga tushmaslik mumkin emas», – degan Rasulzoda.

10 oktyabrʻ kuni Tojikiston prezidenti Emomali Rahmon esa Rossiya Federatsiya kengashi spikeri Valentina Matvienko bilan uchrashuvda mehnat migratsiyasi masalalarini muhokama qildi.

Qayd etish joizki, Moskva viloyatidagi «Krokus Siti Xoll»da  roʻy bergan qoʻporuvchilik harakatidan soʻng Rossiyada nafaqat Tojikiston, balki butun Markaziy Osiyodan borgan mehnat muhojirlariga nisbatan siyosat qattiqlashdi.

Mavzuga aloqador

Eng ko‘p o‘qilgan

Tavsiya qilingan