Isroil qisqa muddatli sulh tuzishni rad etdi

Isroil qamaldagi Gʻazo sektorida ikki kunlik oʻt ochishni toʻxtatish haqidagi Misr taklifini qabul qilishdan bosh tortdi. Ushbu tashabbusni hukumatdagi koʻplab vazirlar qoʻllab-quvvatlagan boʻlsa-da, bosh vazir Benyamin Netanyaxu qarshi chiqdi. U muzokaralar Gʻazoga hujumlar bilan birga davom etishini talab qilmoqda.

Isroil qamaldagi Gʻazo sektorida ikki kunlik oʻt ochishni toʻxtatish haqidagi Misr taklifini qabul qilishdan bosh tortdi, Isroilning KAN davlat televideniesi va Channel 12 ushbu tashabbusni hukumatdagi koʻplab vazirlar qoʻllab-quvvatlagan boʻlsa-da, bosh vazir Benyamin Netanyaxu bunga qarshi chiqqanini maʻʻlum qildi.

Manbalarga koʻra, Netanyaxu Gʻazoga hujumlar davom etsagina, mahbuslarni almashish boʻyicha muzokaralar olib borilishini aytgan. Misr taklifi Isroil xavfsizlik xizmatlari tomonidan ham qoʻllab-quvvatlandi.

Avvalroq Misr prezidenti Abdulfattoh as-Sisi Gʻazo sektorida isroillik asirlarni baʻʻzi falastinlik mahbuslarga almashtirish uchun ikki kunlik oʻt ochishni toʻxtatishni taklif qilgan edi.

Qohirada oʻtkazilgan matbuot anjumanida Jazoir prezidenti Abdulmadjid Tabbun bilan birga soʻzga chiqqan al-Sisi doimiy oʻt ochishni toʻxtatish uchun muzokaralar vaqtinchalik sulhdan keyin 10 kun ichida qayta boshlanishi kerakligini aytdi.

Anklavning shimoliy hududlarida qariyb uch haftadan buyon Isroil armiyasining qattiq qamal va ommaviy hujumlari davom etmoqda.