Isroil mudofaa vaziri Yoav Galant ishdan boʻshatildi

Isroil bosh vaziri Binʻyamin Netanʻyaxu “urush davrida oralarida ishonch yoʻqolgani sababli” mudofaa vaziri Yoav Galantni ishdan boʻshatdi. Uning oʻrniga tashqi ishlar vaziri Isroil Kats tayinlandi. HAMAS ushbu qarorga munosabat bildirdi.

Isroil bosh vaziri Binʻyamin Netanʻyaxu mudofaa vaziri Yoav Galantni ishdan boʻshatdi. Netanʻyaxu ushbu qarorga “urush davrida bosh vazir va mudofaa vaziri oʻrtasida toʻliq ishonch boʻlmagani”ni sabab qilib keltirdi.

«Isroil bosh vaziri sifatidagi oliy vazifam — mamlakat xavfsizligini taʻʻminlash va hal qiluvchi gʻalabaga eltish. Urush davrida bosh vazir va mudofaa vaziri oʻrtasida toʻliq ishonch har qachongidan ham zarur. Kampaniyaning dastlabki oylarida bizda shunday ishonch bor edi va koʻp narsaga erishdik, afsuski, soʻnggi oylarda men va mudofaa vaziri oʻrtasidagi bu ishonchga putur etdi», — deyiladi Netanʻyaxuning bayonotida.

Uning oʻrniga tashqi ishlar vaziri lavozimida ishlab kelayotgan Isroil Kats tayinlandi. Gideon Saar yangi TIV rahbari boʻldi.

Yoav Galantning ishdan boʻshatilishiga norozilik bildirgan yuzlab odamlar poytaxt Tel-Aviv va Quddus koʻchalariga chiqdi. Ular Netanʻyaxuning isteʻʻfosini hamda  HAMAS qoʻlidagi isroillik asirlarni ozod qilishni talab qilmoqda.

HAMAS rasmiy vakili Sami Abu Zuhriy ham ushbu qarorga oʻz munosabatini bildirdi. “HAMASni yoʻq qilaman, deb maqtangan mudofaa vaziri Yoav Galantning oʻzi ishdan boʻshatildi va biz ularga aytamiz: "Galant ketdi, lekin HAMAS qoldi va qoladi, inshaalloh”, - dedi u.