Bombalanayotgan Gʻazo: 206-kunning asosiy voqealari

Isroil Gʻazo sektorida bosqinchilik va qirgʻinbarot urushini boshlaganiga 206 kun boʻldi. 24 soat davomida Gʻazo sektori, Iordan daryosining Gʻarbiy sohili hamda butun Yaqin Sharq hududida sodir boʻlgan asosiy voqealar.

▪️ Bosqinchilar Gʻazo hududlarini bombardimon qilish intensivligini oshirdi. Zarbalar Rafah, Xon Yunis, Nuseyrat lageri, Dayr al-Balah shaharlarida amalga oshirilgan. Kun davomida 113 kishi halok boʻldi.

▪️ Gʻazo sektorida 7 oktyabrdan beri davom etib kelayotgan Isroil tajovuzi oqibatida halok boʻlgan falastinliklar soni 34 454 nafarga etdi, yana 77 575 nafari yaralandi.

▪️ Isroil urushi boshlanganidan beri Gʻazo sektorida 141 nafar jurnalist halok boʻldi.

▪️ Gʻarbiy Sohilda 600 dan ortiq koʻchmanchilar ishgʻolchi harbiylar koʻmagida Al-Aqso masjidini tahqirladi. Koʻchmanchilar Quddus bozorlariga ham bostirib kirdi.

▪️ Falastin prezidenti Mahmud Abbos Ar-Riyodda boʻlib oʻtgan iqtisodiy forum doirasida boʻlib oʻtgan maxsus sessiyadagi chiqishi chogʻida Isroil chegaralarda xavfsizlikni toʻliq taʻʻminlash, falastinliklar esa oʻz taqdiri oʻzi belgilash va mustaqil davlatchilik huquqiga ega ekanini taʻʻkidladi. U BMTga Falastinni tashkilotga toʻlaqonli aʻʻzo sifatida qabul qilishni soʻrab murojaat qildi, shuningdek, Evropa davlatlarini Falastin davlatini tan olishga chaqirdi.

▪️ Le Monde: Frantsiya Isroilga mudofaa eksportini minimal darajaga tushirdi.

▪️ AQSh prezidentligiga nomzod Jill Steyn Vashington universiteti talabalari tomonidan Falastin tarafdorlari namoyishlarida ishtirok etayotgan vaqtda hibsga olindi.

▪️ Al-Jazira: Hozirda 37 million tonna chiqindi yigʻilgan Gʻazoni tiklash uchun 200 yil kerak boʻlishi mumkin.

▪️ The New York Times: Xalqaro jinoiy sud Isroil rasmiylarini, jumladan Netanyaxuni hibsga olishga order berishga tayyorlanmoqda.

▪️ Yakshanba kuni AQShning turli hududlarida Falastinni qoʻllab-quvvatlab namoyish oʻtkazayotgan 200 nafar talaba hibsga olinganidan soʻng jami ushlangan talabalar soni 700 nafarga etdi.