Bombalanayotgan Gʻazo: 175-kunning asosiy voqealari

Isroil Gʻazo sektorida bosqinchilik va qirgʻinbarot urushini boshlaganiga 175 kun boʻldi. 24 soat davomida Gʻazo sektori, Iordan daryosining Gʻarbiy sohili hamda butun Yaqin Sharq hududida sodir boʻlgan asosiy voqealar.

▪️ Bosqinchilar Xon Yunis, Gʻazo markazi va Jabaliyaga hujum qildi. Kun davomida 62 kishi shahid boʻldi, 91 kishi yaralandi.

▪️ Isroilning Gʻazo sektoriga qilgan hujumlarida 7 oktyabrdan beri 32 552 falastinlik, jumladan, kamida 14 280 bola va 9 340 ayol halok boʻldi, yana 74 980 nafari yaralandi.

▪️ Gʻarbiy Sohilda bosqinchilar Nablus, Xevron, Baytlahm va Qalkiliyaga hujum qilmoqda. Oʻnlab falastinliklar hibsga olingan.

▪️ Bosqinchilar Suriyaning Halab shahriga hujum qildi, natijada 33 nafar tinch aholi halok boʻldi.

▪️ Al-Quds radiosi jurnalisti Muhammad Abi Soshil bosqinchilar tomonidan Shifa kasalxonasida qatl etildi. Oʻlgan jurnalistlar soni 137 kishiga etdi.

▪️ Iordaniyada Gʻazoni qoʻllab-quvvatlovchi namoyishlar besh kundan beri toʻxtamayapti. Minglab odamlar Isroilning Ammandagi elchixonasi oldida toʻplanishdi.

▪️ Yaponiya YuNRVAni moliyalashtirishni qaytadan boshlashini maʻʻlum qildi.

▪️ BMT Jahon oziq-ovqat dasturi Gʻazo shimolida ocharchilik «muqarrar» ekani hamda ocharchilikning oldini olish uchun insonparvarlik yordamini «koʻpaytirish» zarurligi haqida ogohlantirdi.

▪️ Belʻgiya tashqi ishlar vaziri: Isroil tinch aholi va bolalarni och qoldirishni bas qilishi kerak.

▪️ AQSh Davlat departamenti ishgʻol ostidagi Gʻazo sektorida Isroil askarlari tomonidan oq bayroq koʻtarib ketayotgan ikki falastinlik oʻldirilib, jasadlari bulʻdozer bilan koʻmib yuborilgani yuzasidan tegishli tergov oʻtkazilishini talab qildi.

▪️ YuNISEF: ishgʻol qilingan Gʻazo sektorida koʻchirilgan 1,7 mln ga yaqin falastinlikning yarmi bolalar boʻlib, ular suv, oziq-ovqat, yoqilgʻi va dori-darmonlarga muhtoj.