Bombalanayotgan Gʻazo: 164-kunning asosiy voqealari

Isroil Gʻazo sektorida bosqinchilik urushini boshlaganiga 164 kun boʻldi. 24 soat davomida Gʻazo sektori, Iordan daryosining Gʻarbiy sohili hamda butun Yaqin Sharq hududida sodir boʻlgan asosiy voqealar dayjesti.

▪️ Bosqinchilar butun sektorga hujum qilishdi: Shifa kasalxonasi, Bayt Lahia, Xon Yunis va Gʻazo markazi. Kun davomida 9 ta ommaviy qotillik sodir etildi, buning natijasida 92 kishi shahid boʻldi, 130 kishi yaralandi.

▪️ Isroilning Gʻazo sektorida 7 oktyabrdan beri davom etgan tajovuzi natijasida halok boʻlgan falastinliklar soni 31 645 nafarga etdi, yana 73 676 nafari yaralandi.

▪️ Gʻarbiy sohilda bosqinchilar Tulkarm, Kalkilya va Baytlahm shaharlariga bostirib kirdi. 25 nafar falastinlik, jumladan, ozod etilgan mahbus Ravda Abu Ajamiya va Al-Xalildan (Xevron - ibroniycha) bir nechta imomlar hibsga olingan.

▪️ YuNISEF rahbari: Isroilning Gʻazoga hujumi natijasida 13 mingdan ortiq bola halok boʻldi. Biz bolalar oʻlimining bunday darajasini dunyoning boshqa hech bir mojarosida koʻrmaganmiz.

▪️ Iroq qarshilik kuchlari: Biz Suriyaning bosib olingan Golan shahridagi Isroil bazasiga uchuvchisiz samolyotlar bilan hujum qildik.

▪️ Bosqinchilar Livan janubidagi Ramia shahriga hujum qildi.

▪️ YuNRVA: Isroilning Gʻazoga uyushtirgan hujumlari natijasida 23 mln tonna vayrona hosil boʻldi. Vayronalarni yigʻishtirish, portlamay qolgan oʻq-dorilarni zararsizlantirishga yillar kerak boʻladi. Uylar, maktablar, shifoxonalar va boshqa fuqarolik infratuzilmalari vayron boʻldi.

▪️ Isroil va AQSh Gʻazo sektorida "gumanitar yordamni himoya qilish va tarqatishda koʻmaklashish" bahonasida sektor hududiga Executive Outcomes, Aegis Defence Services va/yoki avval BlackWater va Triple Canopy nomlari bilan mashhur boʻlgan Constellis kabi xususiy harbiy kompaniyalar xizmatidan foydalanishni rejalashtirmoqda. Tahlilchilar buni Gʻazoga Amerika qoʻshinlarining kiritilishi uchun «boʻshliq» deb hisoblamoqda.

▪️Isgʻol vaziri Ben Gvir yahudiylarga Ramazon oyining oxirgi oʻn kunligida Al-Aqso masjidiga bostirib kirishga ruxsat berilishini talab qilmoqda.