Ўзбекистонда Hyundai Rotem поездлари ишлаб чиқарилиши мумкин
Ўзбекистон транспорт вазири ўринбосари Жасурбек Чориев жума куни Жанубий Кореянинг Hyundai Rotem компанияси таркибидаги Global Rail Group ширкати раҳбари Квак Чоль Хун бошчилигидаги делегация вакиллари билан учрашди.
Gazeta.uzʼнинг Транспорт вазирлиги матбуот хизматига таяниб хабар қилишича, йиғилишда Ўзбекистонда замонавий электропоездлар ишлаб чиқаришни маҳаллийлаштириш лойиҳаси муҳокама қилинган.
Бугунги кунда Жанубий Кореянинг KORAIL компанияси томонидан эксплуатация қилинаётган электропоездлар турини Тошкент йўловчи вагонларини қуриш ва таъмирлаш заводида маҳаллийлаштириш орқали ишлаб чиқариш таклифи юзасидан тақдимот ўтказилди.
Маҳаллийлаштириш асосида ишлаб чиқарилиши кўзда тутилган электропоездларининг асосий техник хусусиятлари бўйича маълумотлар тақдим этилди.
Томонлар лойиҳанинг қўшимча имкониятларини кўриб чиқиш, таклифни таҳлил қилиш ва янги ишлаб чиқариш майдонларини ўрганишга келишиб олди.
Эслатиб ўтамиз, июнда Корея Республикаси президенти Юн Сок Ёлнинг ташрифи чоғида «Ўзбекистон темир йўллари», «Темирйўлэкспресс» ва Hyundai Rotem компаниялари ўртасида янги «Тошкент — Урганч — Хива» тезюрар йўналиши учун олтита электропоезд етказиб бериш ва уларга техник хизмат кўрсатиш бўйича шартнома имзоланган эди.
Август ойида президент олтита Hyundai Rotem поезди харид қилиш лойиҳасининг техник-иқтисодий параметрларини тасдиқлаган эди. Кореянинг Эксимбанки 40 йилга 185,18 миллион евро миқдорида кредит беради.
Шавкат Мирзиёев таклифи билан электропоезд «Жалолиддин Мангуберди» деб номланади. У ишга туширилгач, Тошкентдан Хивага 7 соатда (ҳозирда ярим кундан кўпроқ) етиб бориш мумкин бўлиши кутилмоқда.
Мавзуга алоқадор
-
Давлат раҳбари Ҳажга, Умрага бориб келганлар маънавият тарғиботчиси бўлиши кераклигини таъкидлади.
-
Qatar Airways авиакомпанияси 2 июндан Доха – Тошкент йўналишида доимий парвозларни йўлга қўйди. Қатновлар ҳафтасига тўрт марта – душанба, чоршанба, жума ва якшанба кунлари Airbus 320 самолётларида амалга оширилади. Келгусида парвозлар частотасини ошириш ҳамда Самарқанд ва Бухорога ҳам рейсларни йўлга қўйиш режалаштирилмоқда.
