Шавкат Мирзиёев Туркия вице-президентини қабул қилди
Ўзбекистон президенти Шавкат Мирзиёев учинчи Тошкент халқаро инвестиция форумида иштирок этиш учун мамлакатимизга келган Туркия Республикаси вице-президенти Жавдат Йилмаз бошчилигидаги делегацияни қабул қилди.

Суҳбат аввалида Жавдат Йилмаз давлат раҳбарига Туркия президенти Режеп Таййип Эрдоғаннинг саломи ва эзгу тилакларини етказди.

Учрашувда Ўзбекистон билан Туркия ўртасидаги кенг қамровли стратегик шериклик муносабатлари ва кўп қиррали ҳамкорликни янада кенгайтиришнинг долзарб масалалари кўриб чиқилди.

Шунингдек, фаол мулоқотлар барча даражаларда давом этаётгани катта мамнуният билан қайд этилди. Товар айирбошлаш ҳажми, қўшма лойиҳа ва корхоналар сони, тўғридан-тўғри авиақатновлар кўпаймоқда.

Туркиянинг етакчи компаниялари иштирокида энергетика, кончилик, озиқ-овқат, тўқимачилик ва бошқа устувор тармоқларда йирик инвестиция лойиҳалари амалга оширилмоқда.

Олий даражадаги Стратегик ҳамкорлик кенгашининг бўлажак навбатдаги йиғилиши кун тартибини тайёрлаш, энг аввало, кооперация лойиҳаларининг янги портфели ва маданий-гуманитар алмашинув дастурини шакллантиришга алоҳида эътибор қаратилди.

Туркия вице-президенти Ўзбекистон бош вазири ўринбосари, иқтисодиёт ва молия вазири Жамшид Қўчқоров ҳамда Ўзбекистон Республикаси Олий Мажлиси Сенати раиси Танзила Нарбоева билан алоҳида музокаралар ўтказди.

Мавзуга алоқадор

Энг кўп ўқилган

Тавсия қилинган

Реклама