Жо Байден истеъфога чиқишини рад этди

АҚШ президенти Жо Байден иккинчи муддатга сайланиш уринишидан воз кечиб, давлат раҳбари лавозимида ишлашда давом этишини эълон қилди.

"Биз Америка Қўшма Штатларимиз - агар биргаликда бажарсак, уддалай олмайдиган ҳеч нарса йўқ. Биз фақат кимлигимизни эслашимиз керак. Мен ўз президентлик давримни буни исботлашга бағишладим ва буни бугун, эртага ва ҳар куни давом эттираман, токи мен сизнинг президентингиз сифатида хизмат қилиш шарафига муяссар эканман”, — дейилади АҚШ президенти баёнотида.

Байден президентлик пойгасидан чиққанидан сўнг, Вакиллар палатаси спикери республикачи Майк Жонсон давлат раҳбарини истеъфога чиқишга чақирди.

“Модомики Жо Байден президентликка номзод бўлишга лойиқ эмас экан, у президент бўлишга ҳам лойиқмас. У дарҳол истеъфога чиқиши керак. 5 ноябрь муддатидан олдин келиши мумкин эмас”, - деб ёзди Жонсон Х ижтимоий тармоғидаги саҳифасида.

Байден ўз номзодини сайловдан олиб ташлашга қарор қилгани ўтган якшанба куни маълум бўлди. Унинг сўзларига кўра, у шу ҳафта охирида "ўз қарорини тушунтириш" учун халққа мурожаат қилишни режалаштирмоқда. Байден вице-президент Камала Харрисни ўзининг вориси сифатида тасдиқлади. Янги номзод бўйича қарорни бир неча ҳафтадан сўнг бўлиб ўтадиган Демократлар партияси қурултойи қабул қилиши керак.

Америка президентларининг энг кексаси ҳисобланган 81 ёшли Байден Дональд Трамп билан бўлиб ўтган дебатдан сўнг кучли босим остида қолди, кейин эса оммавий чиқишларида яна кўплаб номуносиб ҳаракатларни содир этди: 12 июль куни НАТО саммитида Байден Украина президенти Владимир Зеленскийни Владимир Путин деб чақирди, 5 кундан кейин телекўрсатувда мудофаа вазири Ллойд Остиннинг исмини эслай олмасдан, "қора одам" деб кетди.

Гарчи Байденнинг рейтинги ҳалокатли пасайиб кетмаган бўлса ҳам (NYT/Sienna сўровига кўра, июль ойи бошида Трамп учун 43 фоизга қарши 49 фоизга эга эди), 20 дан ортиқ конгрессменлар, шу жумладан Сенатдаги Демократик партия етакчиси Чак Шумер президент ўз номзодини қайтариб олиш тўғрисида ошкора сўзлади, Демократик партия донорлари эса хайр-эҳсонларни қайтариб олишни бошладилар.

The New York Times газетасининг ёзишича, Демократик партиядан президентлик кампанияси учун ажратилган 90 миллион доллар маблағ Байден пойгадан чиқмагунича ва партия унинг ўринбосарини топгунига қадар донорлар томонидан музлатиб қўйилган. Байденнинг сайловолди кампанияси учун маблағ йиғувчи Future Forward қўмитаси июль ойи ўрталарига қадар режалаштирилган 700 миллион доллар ўрнига атиги 430 миллион доллар топа олди.

Байденнинг сайловдан атиги тўрт ой олдин бўлиб ўтган президентлик пойгасидан чиқиши 1968 йилда демократ президент Линдон Жонсон муваффақиятсиз кампания туфайли ўз номзодини қайтариб олганидан бери биринчи марта кузатилмоқда. Унинг ўрнига номзодини қўйган вице-президент Хуберт Хамфри эса Ричард Никсонга ютқазганди.

Мавзуга алоқадор

Энг кўп ўқилган

Тавсия қилинган