Шавкат Мирзиёев Рим папаси вафоти муносабати билан ҳамдардлик билдирди
Шавкат Мирзиёев Рим папаси Францискнинг вафоти муносабати билан Рим-католик черкови камерленгоси кардинал Кевин Фарреллга ҳамдардлик йўллади. Бу ҳақда Президент матбуот хизмати хабар берди.
Қайд этилишича, Мирзиёев ўз мактубида Рим папаси Ўзбекистон ва Ватикан ўртасидаги алоқаларни ривожлантириш, динлар ва конфессиялараро дўстликни мустаҳкамлаш, бутун жаҳонда муҳтож инсонларни қўллаб-қувватлаш, эзгу ғояларни кенг тарғиб этиш ишига муносиб ҳисса қўшганини таъкидлаган.
Ўзбекистон президенти Ватикан халқига, ер юзидаги бутун католикларга чуқур таъзия ва ҳамдардлик билдирган.
Маълумот учун, Рим папаси Франциск 21 апрель куни 88 ёшида вафот этди. У 2013 йил Рим-католик черкови раҳбариятини ўз қўлига олганидан бери жами тўрт марта касалхонага ётқизилган. Франциск 2021 йилда қорин бўшлиғида жиддий жарроҳлик амалиётини ўтказган. Бундан ташқари, 2023 йилда чандиқ тўқимасини ва қорин чуррасини даволаш мақсадида яна бир операцияни бошдан кечирган.