Qozogʻiston Xitoyga yangi temir yoʻl qurishni boshladi

Baxti-Ayagoz temir yoʻli Qozogʻiston va Xitoy oʻrtasidagi oʻtkazish qobiliyatini 28 mln tonnadan 48 mln tonnagacha oshiradi.

Qozogʻistonning Abay viloyatida 272 km uzunlikdagi Baxti-Ayagoz yangi temir yoʻl liniyasi qurilishi boshlandi. Bu haqda Qozogʻiston bosh vaziri matbuot xizmati xabar berdi.

Yangi liniya qurilishi davomida Xitoy bilan uchinchi – Baxti-Chuguchak chegara punkti ochilishi rejalashtirilgan.

Umuman olganda, Baxti-Ayagoz temir yoʻl liniyasi Qozogʻiston va Xitoy oʻrtasidagi oʻtkazish qobiliyatini 28 mln tonnadan qariyb 48 mln tonnagacha oshiradi, janubiy nazorat-oʻtkazish punktlaridagi tirbandlikni bartaraf etib, qoʻshimcha tranzit hajmini jalb qiladi. Ikki izli temir yoʻl 2027 yilda foydalanishga topshirilishi rejalashtirilgan.

Keng koʻlamli loyiha xususiy investor ishtirokida davlat-xususiy sheriklik (DXSh) tamoyillari asosida amalga oshiriladi. Qurilish jarayonida 11 ta stantsiya, 47 ta koʻprik, 23 ta temir yoʻl va 8 ta avtomobilʻ yoʻl oʻtkazgichlari, 5 ta piyodalar koʻprigi, 16 ta kuzatuv inshooti quriladi.

“Oxirgi besh yilda tranzit konteyner tashish hajmi 3,2 barobar oshdi. Mavjud tranzit yoʻlaklari kengaytirilib, yangilari ochilmoqda. Transkaspiy xalqaro transport yoʻnalishi, «Shimol-janub» va «Janubiy» yoʻlaklari alohida ahamiyat kasb etdi”, — dedi Smoilov.

Bosh vazirning taʻʻkidlashicha, oʻtgan yili mustaqillikning 30 yilida Qozogʻiston temir yoʻllarida maksimal yuk tashish hajmi 245 mlrd tonna/kilometrni tashkil qilgan. Joriy yilda geosiyosiy vaziyat va infratuzilma cheklovlariga qaramay, yuqori koʻrsatkichlar davom etmoqda, dedi u.

Smoilovning soʻzlariga koʻra, atigi uch yil ichida respublikada 1300 km dan ortiq temir yoʻl quriladi.

“Bularning barchasi nafaqat Abay viloyati, balki butun mamlakat iqtisodiyotiga ijobiy taʻʻsir koʻrsatadi. Baxti-Ayagoz loyihasining amalga oshirilishi Qozogʻiston temir yoʻllari tarmogʻining jahon transport tizimiga integratsiyalashuvini ham tezlashtiradi”, — dedi Smailov.