MDH Parlament assambleyasida Gʻazo sektori bilan bogʻliq bayonot koʻrib chiqildi

Mustaqil davlatlar hamdoʻstligi (MDH) Parlament assambleyasining siyosiy masalalar va xalqaro hamkorlik boʻyicha doimiy komissiyasining navbatdagi majlisida Assambleyaning Falastin davlatining Gʻazo sektoridagi vaziyat toʻgʻrisidagi bayonoti loyihasi koʻrib chiqildi. Unda Oʻzbekiston nuqtai nazari va takliflari ham inobatga olindi.

Mustaqil davlatlar hamdoʻstligi (MDH) Parlament assambleyasining siyosiy masalalar va xalqaro hamkorlik boʻyicha doimiy komissiyasining navbatdagi majlisi boʻlib oʻtdi, deya xabar qildi OʻzA.

Gibrid formatda oʻtkazilgan tadbirda Ozarbayjon, Armaniston, Belarusʻ, Qozogʻiston, Qirgʻiziston, Rossiya va Tojikiston parlamentlari vakillari qatnashdi. Majlisda Oʻzbekiston nomidan Oliy Majlis Senatining Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qoʻmitasi raisi Ravshanbek Alimov ishtirok etdi.

Komissiya aʻʻzolari MDH Parlament assambleyasi kengashi muhokamasiga taqdim etiladigan qator hujjatlar loyihalarini koʻrib chiqdi.

Shuningdek, Assambleyaning BMT va boshqa xalqaro tashkilotlar bilan terrorizmga qarshi kurashish sohasidagi oʻzaro hamkorligi, parlamentlararo birlashmalar tadbirlari toʻgʻrisidagi axboroti eshitildi.

Jumladan, MDH Parlament assambleyasining Falastin davlatining Gʻazo sektoridagi vaziyat toʻgʻrisidagi bayonoti va MDH Parlament assambleyasi huzurida kuzatuvchi maqomi toʻgʻrisidagi nizom loyihalari koʻrib chiqildi.

Muhokama davomida bildirilgan Oʻzbekiston Respublikasining nuqtai nazari va takliflari majlisning yakuniy hujjatlarida inobatga olindi.

MDH Parlament assambleyasining Gʻazo sektori bilan bogʻliq bayonoti qachon eʻʻlon qilinishi hozircha aniq emas.