Tayvanda Xitoydan mustaqillik va AQShga yaqinlashish tarafdori Lay Tsinde prezidentlik saylovlarida gʻalaba qozondi

Tayvandagi prezidentlik saylovlarida hukmron Demokratik progressiv partiya (DPP) vakili Lay Tsinde gʻalaba qozondi. Bu haqda Focus Taiwan va BBC News xabar berdi. Dastlabki hisob-kitoblarga koʻra, 64 yoshli Lay Tsinde qariyb 42 foiz ovoz toʻplamoqda.

Xitoy bilan yaqinlashish tarafdori boʻlgan Gominʻdan partiyasi nomzodi Xou Yui magʻlubiyatini tan oldi. U 33 foiz ovoz toʻpladi. Uchinchi nomzod, Tayvan Xalq partiyasi (TXP) rahbari Ke Venʻchje esa 25 foizga yaqin ovoz oldi.

Lay Tsinde Tayvanning amaldagi vitse-prezidenti va DPP rahbari. U oʻzini "Tayvan mustaqilligi uchun pragmatik kurashchi" deb ataydi va Tayvan allaqachon suveren, mustaqil davlat ekanligini taʻʻkidlaydi. Time nashriga bergan intervʻyusida u Tayvan Xitoy bilan doʻst boʻlishga umid qilishini aytdi. “Biz dushman boʻlishni xohlamaymiz. Xitoy rahbari Si Tszinpinni Tayvanda koʻrishdan xursand boʻlamiz va unga Tayvan tansiq taomlarini tayyorlaymiz”, - degan.

Lay Tsinde, shuningdek, AQSh bilan aloqalarni va oʻz mamlakatining mudofaa qobiliyatini rivojlantirishda davom etishini aytdi.

Bloomberg agentligi Amerika maʻʻmuriyatidagi manbasiga tayanib, Xitoy rahbari Si Tszinʻpin AQSh prezidenti bilan uchrashuvda Lay Tsindening ehtimoliy gʻalabasidan «tashvishda» ekanini bildirganini yozdi. Si Tszinʻpin oʻzining yangi yil tabriknomasida Tayvan bilan qayta birlashish “toʻxtatib boʻlmaydigan tarixiy tendentsiya” ekanini taʻʻkidlagan.

Prezidentlik saylovlarida ovoz berish Pekinning harbiy manyovrlari fonida boʻlib oʻtdi. Tayvan Mudofaa vazirligi oxirgi 24 soat ichida Xitoyning sakkizta samolyoti va oltita harbiy kemasi orolga yaqinlashgani haqida xabar berdi.