Pokiston-Hindiston mojarosi: soʻnggi vaziyat qanday?
Hindiston armiyasi Pokistonni nishonga oldi
Pokiston armiyasi maъlum qilishicha, Hindistonning raketa hujumlari va ikki mamlakat oʻrtasidagi amaliy chegara — Nazorat chizigʻida (LoC) yuz bergan toʻqnashuvlar natijasida halok boʻlganlar soni 31 nafarga, yaralanganlar soni esa 57 nafarga etdi.
Hindiston armiyasi Pokiston va unga bogʻliq Ozod Kashmirda harbiy operatsiya boshladi
Hindiston Matbuot va Axborot byurosi (PIB) bu haqda rasmiy bayonot berdi. Bayonotda armiyaning Pokiston va uning nazoratidagi Ozod Kashmir hududidagi “nishonlarga” qarshi harbiy operatsiya boshlagani bildirildi.
Maъlumotda 9 ta hudud nishonga olingani aytilgan boʻlib, “Pokiston armiyasi obъektlari nishon qilinmagani” taъkidlangan.
Shuningdek, Paxalgamda sodir boʻlgan hujumdan soʻng ushbu qadamlar qoʻyilgani va “masъullar javobgarlikka tortilishi” aytib oʻtilgan.
Hindiston mudofaa vaziri Singx: “Yashasin Hindiston”
Hindiston mudofaa vaziri Radjnat Singx X ijtimoiy tarmogʻida “Yashasin Hindiston” deb yozdi. Hindiston armiyasi esa, Jammu va Kashmirning Pokiston chegarasiga yaqin Bhimber Gali mintaqasida Pokiston tomonidan oʻq uzilganini maъlum qildi.
Bayonotda Pokiston “Otishni toʻxtatish kelishuvi”ni buzgani taъkidlanib, bu harakatga “oʻlchovli tarzda javob qaytarilishi” bildirildi.
Hindiston havo mudofaasi faollashtirildi
Hind matbuotiga koʻra, ismini oshkor etmagan manbalar Hindiston-Pokiston chegarasi boʻylab barcha havo mudofaa boʻlinmalari “har qanday ehtimoliy tahdidga tayyor turishi uchun” faollashtirilganini maъlum qildi. Soʻzlariga koʻra, hujumlar Pokiston hududiga kirmasdan amalga oshirilgan.
Hindiston frantsuz raketa va bombalarini ishlatdi
NDTV kanali xabariga koʻra, Hindiston Pokistonga qilgan hujumlarda Frantsiyada ishlab chiqilgan Hammer boshqariluvchi bombalar va Scalp qanotli raketalarini ishlatgan. Shuningdek, Jammu va Kashmirdagi Shrinagar aeroporti fuqaro parvozlariga yopilgani aytildi.
Bosh vazir Modi: Hujum “Sindur amaliyoti” deb nomlandi
ANI Newsʼning X sahifasidagi maъlumotga koʻra, bosh vazir Narendra Modi operatsiyani doimiy ravishda kuzatib borgan va 9 ta nishonga qilingan hujum “muvaffaqiyatli” boʻlganini aytgan. NDTV'ning xabariga koʻra, u ushbu operatsiyaga “Sindur amaliyoti” nomi bergan.
Modi hukumat yigʻilishida operatsiyani “iftixor lahzasi” deb atab, “Hech qanday xato qilinmadi. Qaytarma zarba muvaffaqiyat bilan yakunlandi”, dedi. U armiya vazifasini yuqori darajada va aniqlik bilan bajarganini taъkidladi.
Maъlumot uchun, hindcha lugʻatga koʻra “Sindur” — turmush qurgan hindu ayollar peshonasiga surtiladigan qizil oʻpka poroshokdir.
Hindistonning hujumiga Pokistonning javobi: 5 samolyot va 1 dron yiqitildi
Geo Newsʼning xabar berishicha, Pokiston xavfsizlik manbalari Hindistonning raketa hujumlariga qarshi javob haqida gapirgan. Ularga koʻra, Hindistonga tegishli 5 ta harbiy samolyot va 1 dron urib tushirilgan.
“Pokiston havo kuchlarining barcha uchoqlari xavfsiz. Pokiston Qurolli Kuchlari dushmanning tajovuziga tegishli javobni bermoqda”, — deyiladi bayonotda.
Hindiston tashqi ishlar vazirligi: “Tahdidlar sababli javob berish majburiyati bor edi”
Hindiston tashqi ishlar vazirligi kotibi Vikram Misri oʻz bayonotida mamlakatga qarshi yangi hujumlar tayyorlanayotgani haqidagi razvedka maъlumotlarini tilga oldi. “Shuning uchun (6 maydagi toʻqnashuvlarda) ham tahdidni toʻxtatish, ham uning oldini olish zaruriyati tugʻildi”, — dedi u.
Misri, Hindiston “qaytarma zarba berish va bu turdagi chegara ortidagi hujumlarni oldini olish huquqidan foydalanganini” bildirib, amalga oshirilgan harakatlar “oʻlchovli va eskalatsiya qiluvchi emas”, deb taъrifladi.
Uning soʻzlariga koʻra, maqsad — “terroristik infratuzilmani yoʻq qilish” boʻlib, asosiy diqqat “Hindistonga yuborilishi mumkin boʻlgan terrorchilarni bartaraf etish”da toʻplangan.
Misri, shuningdek, 22 aprelda Paxalgamda yuz bergan terror hujumi boʻyicha olib borilayotgan surishtiruvlar “hujumchilarning Pokiston bilan bogʻliq boʻlishi mumkinligini” koʻrsatganini aytdi.
Modi xalqaro tashriflarini bekor qildi
India Today nashrining yozishicha, bosh vazir Narendra Modi hujumlardan soʻng Norvegiya, Xorvatiya va Niderlandiyaga rejalashtirilgan tashriflarini kechiktirgan.
