Nigeriyada yana benzovoz halokati: 80 kishi ommaviy qabrga koʻmildi

Nigeriyada benzovoz agʻdarilishi natijasida 60 tonna yoqilgʻi erga toʻkildi. Uni yigʻish uchun olomon toʻplangan vaqtda portlash roʻy berdi va kamida 86 kishi halok boʻldi. Qurbonlarning kamida 80 nafari ommaviy qabrga koʻmildi. Oktyabrda ham xuddi shunday holatda 180 dan ortiq odam oʻlgandi.

Nigeriyada yoqilgʻi tashuvchi tanker bilan sodir boʻlgan dahshatli hodisa natijasida koʻplab insonlar qurbon boʻldi. Maʻʻlumotlarga koʻra, oʻtgan shanba kuni Diko shahrida (Niger shtati) yoqilgʻi tashuvchi mashina haydovchisi boshqaruvni yoʻqotishi natijasida tsisterna agʻdarilib ketgan.

Voqea joyiga mahalliy aholi oqib kelgan va umumiy hajmi 60 tonna boʻlgan toʻkilgan yoqilgʻini yigʻa boshlagan. Olomon yoqilgʻi tankerini zich oʻrab olgan vaqtda kuchli portlash sodir boʻlgan.

Ayni damda 86 kishi halok boʻlgani, ellikdan ortigʻi yaralangani tasdiqlangan. Voqea qurbonlarining kamida 80 nafari ommaviy qabrga dafn etilgan.

Shunga oʻxshash hodisa 2024 yil oktyabrʻ oyida ham roʻy bergan edi. Oʻshanda yoqilgʻi tsisternasi portlashi oqibatida 180 dan ortiq odam halok boʻlgandi. Oʻlganlarning aksariyati tsisternadan toʻkilgan yoqilgʻini yigʻib olish vaqtida yuzaga kelgan portlashda oʻlgandi.