Mossad rahbari Evropada Qatar bosh vaziri bilan uchrashdi

 

Mossad rahbari David Barnea 15-16 dekabrʻ kunlari Evropada Qatar bosh vaziri Shayx Muhammad bin Abdulrahmon Ol Soniy bilan uchrashdi. Uchrashuvda Gʻazoda qolgan garovga olinganlarni ozod qilish boʻyicha Hamas bilan bilvosita muzokaralarni qayta boshlash muhokama qilindi, deya xabar berdi The Wall Street Jornal Vashingtondagi manbalariga tayanib.

Manbalarning qayd etishicha, Barneaning Qatar bosh vaziri bilan uchrashuvi uzoq va murakkab muzokara jarayonining boshlanishi xolos. Markaziy razvedka boshqarmasi rahbari Bill Berns va Misr razvedka xizmati rahbari Abbas Kamil muzokaralar qayta boshlangani haqida xabardor qilingan.

Qatar vositachilari oʻtgan hafta Isroil rasmiylari bilan bogʻlanib, Hamas bilan bilvosita muzokaralarni qayta boshlashdan manfaatdor yoki yoʻqligini bilishgan, deya xabar qildi Amerikaning Axios nashri.

Nashr suhbatdoshlaridan birining aytishicha, kelishuv ayollar, qariyalar, ogʻir kasal va ogʻir tan jarohati olganlarni ozod etishni oʻz ichiga olishi mumkin.