Isroil armiyasi Suriya hududini egallashni boshladi - «Al-Jazira»

Qatarning «Al-Jazira» telekanali Isroil qoʻshinlarining Suriya janubida, xususan, Qunaytra provintsiyasida joylashgan chegaradagi Kovdana va Xadr qishloqlari hududida oldinga siljishi aks etgan lavhalarni eʻʻlon qildi. 

Lavhalar Isroilning soʻnggi ikki oy davomida muhokama qilinayotgan Golan tepaliklarining Suriya tomonida  bufer zonasini yaratish haqidagi taxminlarni ilk bor tasdiqlaydi. Shu bilan birga, Bashar Asad hukumati, avvalgidek, isroillik harbiylarning harakatlariga nisbatan sukut saqlashni afzal koʻrmoqda.

Telekanal maʻʻlumotlariga koʻra, Isroil tanklari va zirhli texnikalari Suriya chegarasini kesib oʻtgan va yangi chegara chizigʻini yaratish boʻyicha muhandislik ishlari olib borilayotgan Tina va Xadr qishloqlari oraligʻidagi hududda joylashgan. Mahalliy aholi jurnalistlarga Isroil harbiylari texnika harakatini osonlashtirish uchun ularning qishloq xoʻjaligi erlarini qanday vayron qilayotgani haqida gapirib berishdi. 

“Chegara yaqinida joylashgan 300 sotixga yaqin erlarimiz vayron qilindi va bosib olindi. Isroil harbiylari ham chorvalarini yaylovsiz qoldirib, choʻponlarni haydab chiqarmoqda. Natijada koʻplab oilalar yagona daromad manbaidan mahrum boʻlmoqda”, deydi Muhammad ismli mahalliy aholi vakillaridan biri telekanalga.

Bashar Asad rejimining hukmron "Baas" partiyasi vakillarining kamdan-kam bayonotlari bilan chegaralanib, chegarada sodir boʻlayotgan voqealar haqida maʻʻlumotlar sizib chiqishining oldini olish uchun qattiq choralar koʻrmoqda. Mahalliy aholining aytishicha, chegara hududlariga yaqinlashmoqchi boʻlgan har bir kishi hibsga olinishi xavfi bor.

Xabarlarga koʻra, Isroil harbiy faoliyatdan tashqari, bosib olingan Golan tepaliklarida yahudiy bosqinchilar sonining koʻpayishiga faol yordam bermoqda. Oʻzini Abu Iso deb tanishtirgan fuqaroning "Al-Jazira" telekanaliga aytishicha, Majdal Shams, Katzrin, Ayn Zivan va Ramat Magshimim kabi aholi punktlarida oxirgi paytlarda ishgʻolchilar soni sezilarli darajada oshgan.

Koʻplab ekspertlar va mintaqa aholisi Isroilning harakatlari hududlarni yanada annektsiya qilish va ularni toʻliq boʻysundirishga qaratilganidan xavotir bildirmoqda. Bufer zonaning yaratilishi Isroilning Suriyaning bu qismi ustidan nazoratini mustahkamlash yoʻlidagi navbatdagi qadam boʻlishi aytilmoqda.

Isroil bosib olingan hududlarda infratuzilmasini rivojlantirishda davom etar ekan, Suriya hukumati bu harakatlarning oldini olish uchun deyarli hech qanday chora koʻrmayapti. Damashqdan javob yoʻqligi mahalliy aholi oʻrtasida norozilik kuchayishiga sabab boʻlmoqda, ular oʻzlarini taqdir hukmiga tashlab ketilgandek his qilmoqda.

Isroilning Golan tepaliklaridagi faoliyati mintaqadagi keskinlikni kuchaytirmoqda va xalqaro hamjamiyat mojaroning yanada kuchayishiga yoʻl qoʻymaslik haqida tobora koʻproq soʻramoqda.