Gʻazoda oʻt ochishni toʻxtatish boʻyicha muzokaralar boshi berk koʻchaga kirib qoldi

HAMAS rasmiy vakili Gʻazoda oʻt ochishni toʻxtatish boʻyicha muzokaralar boshi berk koʻchaga kirib qolgani, Falastin guruhi moslashuvchanlik koʻrsatayotganiga qaramasdan, Isroil bosh vaziri Benʻyamin Netanyaxu ikki tomonning kelishuvga erishishiga toʻsiqlar yaratayotganini maʻʻlum qildi.

HAMAS rasmiy vakili Usama Hamdan payshanba kuni Falastin guruhi moslashuvchanlik koʻrsatganiga qaramay, Gʻazoda oʻt ochishni toʻxtatish boʻyicha muzokaralarda hech qanday ilgarilash yoʻqligini maʻʻlum qildi.

Hamdan Isroil bosh vaziri Benʻyamin Netanyaxu ikki tomonning kelishuvga erishishiga toʻsiqlar yaratayotgani hamda garovga olingan isroilliklarni ozod qilishdan “manfaatdor emasligini” aytdi. Hamdan Bayrutdagi matbuot anjumanida "Ishgʻol hukumati qochishda davom etmoqda va muzokaralar yopiq doiraga tushib qoldi", dedi.

Avvalroq Qatar poytaxti Doxada Isroil va Falastinning HAMAS harakati delegatsiyalari oʻrtasida asirlarni almashish boʻyicha kelishuvga erishishga qaratilgan muzokaralari rasman boshlangani, muzokaralar taxminan ikki hafta davom etishi mumkinligi haqida xabar bergan edik. Biroq Misr va Qatarning AQSh tomonidan qoʻllab-quvvatlangan saʻʻy-harakatlari shu paytgacha oʻt ochishni toʻxtatishga erisha olmadi. HAMAS Isroil harbiy hujumini toʻxtatish uchun har qanday sulhni istasa-da, Isroil harbiy kampaniyani toʻxtatish majburiyatini rad etib, garovga olinganlar evaziga mahbuslarni ozod qilish boʻyicha kelishuvni afzal koʻrmoqda.

Gʻazo Sogʻliqni saqlash vazirligi payshanba kuni eʻʻlon qilgan bayonotda 7 oktyabrdan beri Isroilning Gʻazo sektoriga uyushtirgan harbiy hujumida 33 037 dan ortiq falastinlik halok boʻlgani, 75 668 nafari yaralangani aytiladi.