Erondagi koʻmir konida portlash sodir boʻldi: qurbonlar soni 52 kishiga etdi

Eronning Janubiy Xuroson viloyatida koʻmir konida metan gazi sizib chiqishi oqibatida portlash sodir boʻldi. Hodisada halok boʻlganlar soni 52 nafarga etdi, 20 kishi jarohatlandi. Viloyatda 3 kunlik motam eʻʻlon qilindi.

Eronning Janubiy Xuroson viloyatidagi Tabas koʻmir konida yuz bergan portlash qurbonlari soni ortib bormoqda. Shaxtaning B va S bloklarida metan gazi sizib chiqishi natijasida sodir boʻlgan portlashda hayotdan koʻz yumganlar soni 52 nafarga etdi, eng kamida 20 kishi jarohatlandi.

Hodisa vaqtida voqea joyida 69 kishi ishlagan, dedi Janubiy Xuroson gubernatori Javad Genaatzoda. Vayronalar ostida qancha odam qolgan boʻlishi mumkinligi haqida xabar berilmagan.

Tabas koni 30 ming kvadrat kilometrdan ortiq maydonni egallaydi va Eron poytaxti Tehrondan taxminan 540 km uzoqlikda joylashgan. Eron davlat axborot agentligi IRNA Tabasni mamlakatdagi "eng boy va eng katta koʻmir tumani" deb ataydi.