Ramazonda boʻlmasa qachon?
"Ramazon oyida gunohlaridan poklanib olmasa, qachon poklanadi axir?!" Bu xitob ayniqsa, umrining xazonrezgi mavsumida yashayotgan, hayot yoʻlining soʻnggi bekatlari koʻrinib qolganlar uchun taʻʻsirchan eslatma, ogohlantirishdir. Sizni bilmadimu, ammo men hadisdagi "boʻlmasa qachon axir?" savolichalik oʻyga toldiradigan, koʻngilga xavotir va iztirob soladigan boshqa savolni bilmayman...
Kecha kechqurun yozganlarimni tartibga solayotib, ularning
orasida bir hadis yozilgan qogʻozga koʻzim tushdi. Anas ibn Molikdan rivoyat
qilingan mazkur hadisda shunday deyilardi:
"Mana yana Ramazon keldi. Bu oyda jannat eshiklari
ochiladi, doʻzax eshiklari esa, yopiladi va shaytonlar zanjirband qilinadi. Mana
shunday Ramazon oyiga etishib turib ham gunohlaridan poklanib ololmaganning
holiga voy boʻlsin! Ramazon oyida gunohlaridan poklanib olmasa, qachon poklanadi
axir?!" (Tabaroniy rivoyati)
Ushbu hadisi sharifni oʻqib, avvaliga sevindim. Keyin esa,
undagi bir jumla ustida oʻylanib qoldim. Ana shu birgina jumladan tuygan
hissiyotlarimni Siz bilan oʻrtoqlashmoqchiman.
"Ramazon oyida gunohlaridan poklanib olmasa, qachon
poklanadi axir?!" Bu xitob ayniqsa, umrining xazonrezgi mavsumida yashayotgan,
hayot yoʻlining soʻnggi bekatlari koʻrinib qolganlar uchun taʻʻsirchan eslatma,
ogohlantirishdir. Sizni bilmadimu, ammo men hadisdagi "boʻlmasa qachon axir?" savolichalik
oʻyga toldiradigan, koʻngilga xavotir va iztirob soladigan boshqa savolni
bilmayman.
Gunohlar toʻzonida gʻubor bosib, qoraygan umr daftarini
tozalash imkoni tugʻiladigan mavsumga – Ramazon oyiga ishora qilib, achinarli
xotima ehtimolidan ogoh etadigan soʻroq bu...
Nima qilib boʻlsa-da, mana shu oyda gunohlardan poklanib olish
lozimligini uqtiradigan, "buning uchun ushbu oydan qulay fursat yoʻq",
degan maʻʻnoni oʻz zamiriga yashirgan savol bu...
Bu savol meni turtib, jaholat mastligidan hushyor, gʻaflat
uyqusidan bedor qildi.
Siz-chi,
aziz doʻstim, Siz taʻʻsirlanmadingizmi hadisdagi bu xitobdan? Siz ham xavotirga
tushmadingizmi? Oʻzingizga oʻzingiz "Shoshma", deya bir dam tafakkurga
choʻmmadingizmi? Yoki bu yoʻlga oʻzingizni tayyor deb hisoblaysizmi? Har bir amal niyatga bogʻliq deyilganidek,
magʻfirat yomgʻirida boshdan-oyoq poklanishga hozirmisiz? Xotimangizdan
xotirjamdirsiz balki? Agar shunday boʻlsa, Sizning bu xotirjamligingiz havasga,
hatto, hasadga loyiq!
Biroq men hamon "boʻlmasa qachon axir?" degan
xitobdan va u esga soladigan abadiy badbaxtlik ehtimolidan, gunohlardan poklana
olmay qolishdan, rahmat mavsumida qaqroq lab bilan suvsiz qolib ketishimdan
qoʻrqyapman. Umidim shamchirogʻi xavotirim xuftonini hech yorita olmayotir. Xullas,
qoʻrqyapman, doʻstim, qoʻrqyapman.
"Boʻlmasa qachon axir?" Qaniydi bu savolga: "Shu
Ramazonda, ha-ha, albatta mana shu Ramazon oyida!" – deb javob bera
olsaydim va uni amalga oshirishga shahd bilan shaylansaydim, bundan oʻzimni juda
baxtiyor his qilardim.
Nima deysiz, doʻstim, Siz bu yoʻlda meni ezgu niyatlaringiz,
duolaringiz bilan qoʻllab turasizmi? Men esa ana shu "boʻlmasa qachon
axir?" soʻrogʻi hech qachon Sizga tegishli boʻlib qolmasin, deb duo qilaman.
Ilohim, ushbu Ramazon magʻfiratingiz shoni, poklanishingiz nishoni boʻlsin, deyman.
Soʻzimning nihoyasida yana bir marta oʻzimdan soʻrayman:
"Poklanish Ramazonda boʻlmasa, qachon axir?"
Sodiq Nosir
.png)
Mavzuga aloqador
-
BAA astronomlari 2024 yilgi Ramazon oyining taxminiy boshlanish sanasini hisoblab chiqdi.
-
Oʻzbekiston musulmonlari idorasi Oʻzbekistonda Ramazon oyining birinchi kuni 11 mart sanasiga toʻgʻri kelishini maʻʻlum qildi. Turkiya davlatlar ulamolari fiqhiy qoidalarga tayangan holda falakiy hisob-kitob va astronomik kuzatuvlarni eʻʻtiborga olib bu haqda yakdil qarorga keldi.
